Sátbaev qalasynda ultymyzdyń yqylym zamannan kele jatqan aspaptarynda oınaıtyn ónerpazdar arasynda Erden Sandybaıuly atyndaǵy dástúrli III respýblıkalyq baıqaý ótti. Buǵan deıin baıqaýda tek qobyzshylar ǵana baq synap kelse, bul joly sybyzǵyshylar men sazsyrnaı sheberleri, sondaı-aq jetigen aspabynda oınaýdy jetik meńgergen órender óner jarystyrdy.
Baıqaý shymyldyǵy aǵa sultan Erdenniń balasy Baımendeden aıyrylyp qaıǵy jutqan baqytsyz shaǵyn baıandaıtyn sahnalyq qoıylymmen ashyldy. Budan keıin sahna tórine Sátbaev qalasynyń ákimi Asqar Ydyrysov kóterilip, baıqaýǵa qatysýshylar men kórermenge quttyqtaý sóz arnady.
– Bul aspaptar – ultymyzdyń tarıhı-etnostyq mádenıetiniń kónermes kózi, rýhanı qazynasy, baǵa jetpes múlki. Jahandaný aranyna jutylyp ketpes úshin jan dúnıemizdi jadyratyp, rýhymyzdy dúr silkindiretin osyndaı baıqaýlardy uıymdastyrý – qasıetti boryshymyz. Elbasynyń «Rýhanı jańǵyrý» baǵdarlamasy tereńge tamyr jibergen qasıetti ulttyq kodymyzdy sanamyzda qaıyra jańǵyrtýǵa úndep otyr. Túpki maqsat, basty meje osy, – dep túıindedi sózin qala basshysy.
Baıqaýdyń saltanatty ashylý rásiminde kórermen qaýym jergilikti óner mektebiniń ult-aspaptar toby men Qaraǵandydan arnaıy kelgen «Arqa ajary» folklorlyq ansambliniń konserttik baǵdarlamasyn tamashalady. Buǵan qosa óńirge belgili jeztańdaı ánshi Qurmash Ybyshevtyń ánderine qulaq quryshyn qandyrdy.
Baıqaýǵa qatysýshy úmitkerlerdiń aspapta oryndaý sheberlikterin Qazaqstannyń eńbek sińirgen qaıratkeri Ermurat Úsenov bastaǵan qazylar alqasy tarazylady.
Baıqaýdyń ekinshi kúni ótken irikteý kezeńinde elimizdiń ár aımaǵynan kelgen ónerpazdar ózara synǵa tústi. Qazylar alqasy alǵashqy kezeńde baq synaǵan 34 qatysýshynyń arasynan ekinshi kezeńge 14 ónerpazdy iriktep shyǵardy.
Baıqaýdyń úshinshi kúninde qazylar men kórermenniń kóńilinen shyǵyp, oza shapqan ónerpazdardyń esimderi anyqtaldy. Tartysty ótken óner saıysynyń I orynǵa taǵaıyndalǵan árqaısysy 200 myń teńge bolatyn eki júldesi almatylyq Marııam Úsen men Soltústik Qazaqstan oblysynyń ókili Aıdos Aqylbekovke buıyrdy.
Al bas júldege Astana qalasynan kelgen ónerpaz Farıza Qosshyǵulova laıyqty dep tanyldy. Sanany jańǵyrtqan óner saıysynyń jeńimpazy arnaıy dıplommen jáne 400 myń teńgeniń sertıfıkatymen marapattaldy.
Qaırat ÁBILDA,
«Egemen Qazaqstan»
Qaraǵandy oblysy,
Sátbaev qalasy
Sýretti túsirgen Merýert NAÝRYZBAEVA