О́ńirde jap-jaqsy mádenı sharalar bastaý alǵanymen, túrli sebeptermen jalǵasyn tappaı qalatyn sátter kezdesedi. 2014 jyly alǵash ret shymyldyǵy túrilgen «Gaýhar tas» festıvaliniń ǵumyry kelte bolǵan edi.
Endi, mine, araǵa tórt jyl salyp ekinshi respýblıkalyq halyq aspaptar orkestrleri men ansamblderiniń «Gaýhar tas» baıqaýy «Rýhanı jańǵyrý» baǵdarlamasy aıasynda qaıta jańǵyryp, elimizdiń ár qıyrynan kelgen 300-ge jýyq ónerpazdyń basyn biriktirdi.
Bıyl 200 jyldyǵy keń kólemde atap ótiletin ári batyr, ári aqyn, ári jyrshy, ári sazger Segiz seriniń ólmes murasyn ulyqtaýǵa baǵyttalǵan mádenı shara shyǵarmashylyq ujymdardyń baılanysyn arttyryp, talanttylardy qoldady. Tórt orkestrdiń, bes folklorlyq ansambldiń súıemeldeýimen halyq ánderi de, Segiz seriniń shyǵarmalary da asqan shabytpen oryndaldy. Mádenıet qaıratkeri Qaıyrly Ǵafýrov kórkemdik jetekshilik ári dırıjerlik etetin oblystyq fılarmonııa janyndaǵy Segiz seri atyndaǵy qazaq halyq aspaptar orkestrine birinshi kúngi baǵdarlamany ashý qurmeti buıyrdy. Jeztańdaı ánshi Vasılıa Gabıdýllına «Alqońyr» ánin naqyshyna keltire shyrqap berdi. Isa Baızaqovtyń «Jeldirmesi», «Jolaman Tursynbaevtyń «Qyz qaraǵaıy» tartý etildi.
Festıvaldiń ekinshi kúni gala-konsertke jalǵasyp, onyń shymyldyǵyn Aqmola memlekettik akademııalyq fılarmonııasy janyndaǵy «Saryarqa» halyq aspaptar ansambli ashyp, «Syr tolǵaýy», «Qarqara» týyndylaryn usynsa, qasıetti Semeı jerinen kelgen «Qalamqas», «Kerbez» folklorlyq ansamblderi sahna tórin qaly kilemdeı jaınatyp jiberdi. «Ahaý, Semeı», «Shańdy joryq», «Abaıdyń eli» shyǵarmalarynan shashý shashty. Mańǵystaý oblysy Abaı atyndaǵy mádenı-demalys kesheniniń halyq aspaptar orkestri tańdaı qaqtyryp, kóz jumdyrdy. Barlyq orkestrler qatysa otyryp Qazaqstannyń eńbek sińirgen ártisi Jalǵasbek Begendikovtiń dırıjerlik etýimen Qurmanǵazynyń «Serperi» oınalǵanda qazaqtyń salqar dalasyn myń san tulpardyń tuıaq dúbirine bólep jibergendeı boldy. Jastar saraıynda ıne shanshar orynnyń bolmaýyna qaraǵanda áýezdi ánder, kúmbirlegen kúıler kórermenderge tamasha kesh syılaǵan tárizdi.
Belgili sazger J.Tursynbaevtyń «Qurmanǵazy kúı kemeńgeri bolsa, Segiz seri – án jampozy. Bul eki alyp tulǵa – qazaq halqynyń maqtanyshtary. Ulttyq qundylyqtarymyzdy keńinen nasıhattap, jurtshylyqqa mán-mańyzyn jete uqtyratyn mundaı sharalardy júıeli túrde uıymdastyrǵan jón. Sońǵy kezderi jurtshylyqtyń dástúrli ánge degen qurmet-qoshemeti artyp keledi. Jas býyn da Segiz seriniń shyǵarmalaryn bilip ósse degen tilegim bar» degen sózine alyp-qosarymyz joq.
О́mir ESQALI,
«Egemen Qazaqstan»
Soltústik Qazaqstan oblysy