Batys Qazaqstan oblysynyń ákimi Altaı Kólginov 26 sáýir kúni Helsınkıge baryp, qalalyq ınfraqurylymdy damytý, qorshaǵan ortany qorǵaý jáne qaldyqtardy óńdeý salalary boıynsha fın tájirıbesimen tanysty.
Sapar barysynda ákim Fınlıandııa Syrtqy ister mınıstrligi Memlekettik hatshysynyń orynbasary M.Keınıanenmen kezdesti. Kezdesýde ekijaqty áriptestikti damytý máseleleri sóz boldy.
Altaı Kólginov Qazaqstan Respýblıkasynda, sonyń ishinde Batys Qazaqstan óńirinde qolǵa alynǵan «jasyl» ekonomıkany damytýdyń barysy, Memleket basshysy alǵa qoıǵan ekonomıkany jańǵyrtý strategııalyq tapsyrmasy týraly aıtyp berdi. Osyǵan baılanysty qalpyna keltiriletin qýat kózderin paıdalaný, qaldyqtardy óńdeý salasyn jetildirý sekildi mańyzdy baǵyttar óńir ekonomıkasyn damytýda basym baǵytqa ıe bolǵan.
Helsınkıde qazaqstandyq delegasııa Fınlıandııanyń «VTT» tehnologııalyq zertteýler ortalyǵy ázirlegen «Smart-sıtı» tehnologııasyn endirýdiń jańa tujyrymdamasymen jáne qaldyqtardy óńdeý óndirisimen tanysty.
Espoo qaldyqtardy óńdeý ortalyǵyn aralap kórgen óńir basshysy Fınlıandııanyń astanasy men onyń mańyndaǵy eldi mekenderge qyzmet kórsetetin «HSY» mýnısıpaldyq kásipornynyń jumysymen jaqyn tanysty. Delegasııa basshysy Batys Qazaqstan oblysy Sýomımen ozyq tehnologııa salasyndaǵy áriptestikti odan ári damytýǵa múddeli ekendigin bildirdi. Fın jaǵynyń qatysýymen Oral qalasynda iske qosylady dep kútip otyrǵan qaldyq óńdeıtin ekologııalyq keshende osy zamanǵy eń ozyq tehnologııalar paıdalanylmaq.
Jobalaýshylardyń pikirinshe, bul qaldyqty jınaý, tasymaldaý, suryptaý, óńdeý máselelerin qamtıtyn keshendi ınfraqurylym bolmaq.
Sapar barysynda Helsınkı qalasynda Batys Qazaqstan oblysy ákimdigi, Fın Bıznes-haby jáne men «Collaprime» kompanııasy arasynda Áriptestik týraly úshjaqty kelisimge qol qoıyldy.
Aıta ketý kerek, batysqazaqstandyqtar men fın kompanııalary áriptestiginiń alǵysharty 2017 jyly Astana qalasynda ótken «EKSPO-2017» halyqaralyq kórmesinde jasaldy. Odan keıin de Batys Qazaqstan ákimdigi men «Collaprime» kompanııasy basshylary birneshe márte kezdesip, Oral qalasyndaǵy kásiptik-tehnıkalyq arnaýly oqý oryndarynda 3D-jobalaý salasy boıynsha oqytýshylardyń biliktiligin arttyryp, jańa mamandyqqa daıarlaý daıyndyǵy bastalǵan bolatyn.
Oral qalasynda «Smart City Uralsk» jobasy qolǵa alynyp, qazirdiń ózinde qala turǵyndarynyń ómirine IT tehnologııasy dendep enip barady. Fındik BIM jáne 3D-jobalaý tehnologııasyn Batys Qazaqstan óńiriniń kommýnaldyq ınfraqurylymy men qurylys salasynda keńinen qoldaný ekijaqty paıdaly bolary anyq.
Kóptegen halyqaralyq syılyqtardyń jeńimpazy atanǵan «Collaprime» kompanııasy 2016 jyly Fınlıandıda BIM-tehnologııa boıynsha eń úzdik uıym ataýyna ıe bolǵan.
Qazbek QUTTYMURATULY
«Egemen Qazaqstan»
Batys Qazaqstan oblysy