Ońtústik Qazaqstan oblysynda 1 mamyr – Qazaqstan halyqtarynyń birligi kúni merekesine oraı otandyq taýar óndirýshilerdiń jármeńkesi ótti.
Shymkenttegi bul jármeńkeni nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan "Eńbek" baǵdarlamasynyń jemisi desek te bolar. Memlekettik baǵdarlama aıasynda óz kásibin dóńgeletken 60 kásipker qala turǵyndaryna ózderiniń taýarlaryn, ıaǵnı et -sút ónimderin, jemis-jıdek, kókónister men qolóner sheberleriniń buıymdaryn satty. Árıne, jármeńke merekelik bolǵandyqtan oıyn-saýyq jáne konserttik shoý-baǵdarlamalar qoıylyp, syılyqtar utysy uıymdastyryldy. Lotereıa bıletteri utysty bolǵan turǵyndarǵa jármeńkeden taýar alýǵa múmkindik beretin aqshalaı kýpondar tabys etildi.
Aıta ketelik, «Eńbek» baǵdarlamasy arqasynda «Damý» qory arqyly Ońtústik Qazaqstan oblysy boıynsha 150 azamat óz isin ashýǵa jáne kásibin keńeıtý múmkindigine ıe boldy. Jalpy baǵdarlama boıynsha qarjylandyrý kólemi - 1,4 mlrd. teńge.
Erin DOSYMBAI,
Ońtústik Qazaqstan oblysy