Hokkeıden Qazaqstan ulttyq quramasy Vengrııa astanasy Býdapesht qalasynda ótken álem chempıonatynyń sońǵy matchynda Polsha quramasyn 6:1 esebimen jeńgenimen, ekinshi jyl qatarynan TOP dıvızıonǵa joldama ala almady.
Álem birinshiliginiń sońǵy týr oıyndary aldynda Polsha quramasynan basqa barlyq komandalardyń Joǵary topqa shyǵýyna múmkindikteri bar edi. Al qazaqstandyq hokkeıshiler Polshany jeńgennen soń TOP dıvızıonǵa ótý-ótpeýi aıdyn ıeleri Vengrııa-Ulybrıtanııa jáne Slovenııa-Italııa quramalarynyń oıyndaryna baılanysty boldy. О́ıtkeni jarys qojaıyndary brıtanııalyqtardy jeńetin bolsa, ekinshi oıynnyń nátıjesine qaramaı Qazaqstan men Vengrııa quramalarynyń upaıy birdeı bolyp, otandastarymyz alǵashqy oıynda Vengrııany jeńgeni eskerilip, topta birinshi orynmen álem chempıonatynyń Joǵary tobyna joldama alýǵa múmkindigi bar bolatyn. Al eger Italııa quramasy Slovenııany jeńetin bolsa, Qazaqstanmen upaıy teńesip, jeke kezdesý boıynsha otandastarymyzdy jeńgen ıtalııalyqtar birinshi orynmen, qazaqstandyqtar ekinshi orynmen kelesi topqa ótetin edi. Tipti Slovenııa men Italııa negizgi ýaqytty teń aıaqtaǵanda, biz úshin eń utymdy nátıje sol bolatyn. О́kinishke qaraı vengrııalyq hokkeıshiler de Ulybrıtanııamen negizi ýaqytta 2:2 esebimen teń oınap, oıyn sońyndaǵy býllıt serııasynda jeńilip qaldy. Italııa quramasy bolsa slovenııalyqtardan 4:3 esebimen basym tústi. Ulybrıtanııa men Italııa quramalary TOP dıvızıonǵa joldama aldy.
Chempıonat qorytyndysy boıynsha úsh jeńis, eki jeńilisi bar Qazaqstan quramasynyń hokkeıshileri toǵyz upaımen úshinshi orynda qalyp qoıyp, kelesi jyly da I dıvızıonnyń «A» tobynda oınaıtyn boldy. Birinshi oryndy 11 upaıy bar Ulybrıtanııa quramasy enshiledi. Al topta eń sońǵy oryn alǵan Polsha quramasy «V» tobynyń I dıvızıonyna syrǵydy.
Álı BITО́RE,
«Egemen Qazaqstan»