Aıagóz aýdanynyń Aıǵyz aýylynda balýan, kezinde burynǵy Shubartaý aýdany men Semeı oblysynyń birneshe dúrkin jeńimpazy, júldegeri bolǵan Jeńis Ibraımovtyń júldesine jasóspirimder arasynda qazaqsha kúresten týrnır ótti.
Jarysqa aýdandaǵy 2004, 2005, 2006, 2007, 2008 jyldary týǵan 200-den astam bala qatysyp, saıys qorytyndysynda sonyń 56-sy júldeger atandy. Komandalyq esepte Aıagóz qalasynyń balǵyn balýandary 1, Aıǵyz ben Myńbulaqtyń órenderi tıisinshe 2-3 oryndardy ıelendi.
1945 jyly Aıagóz aýdanynyń Aıǵyz aýylynda dúnıege kelgen Jeńis Ibraımov Shubartaýdaǵy saıystardy eseptemegende 1967 jyly Keńes Odaǵynyń 50 jyldyǵyna oraı ótken oblystyq chempıonatta, sol jyly Semeı oblystyq IV jazǵy spartakıadasynda jeńimpaz atanady. 1968 jyly Almaty qalasynda uıymdastyrylǵan jarysta 3 orynǵa ıe bolady. Qazaq kúresimen kásibı túrde shuǵyldanbasa da az ýaqytta bıik belesterdi baǵyndyrǵan balýan aýylda sport nusqaýshysy, taǵy basqa da qyzmetterdi atqarady. Kúsh ıesiniń kózin kórgen zamandastary Jeńis Ibraımovty saǵynyshpen tebirene eske alady.
«1967 jyldan bastap Jeńis ekeýmiz kúreske birge qatysyp júrdik. Osy jyly sáýirdiń 3-5 aralyǵynda Aıagóz qalasynda Semeı oblysy boıynsha ár aýdannan eki júzdiń ústinde balýandar jınaldy. Aıagózdiń klýbynda úsh kún boıy kúrestik. Bul – Jeńistiń kúreske alǵash barǵan kezi edi. Sonyń ózinde 5 adammen kúresip, beseýin de taza jeńdi. Kúresken adamdarynyń bári birinshi razrıad, sport sheberliginen úmitker degendeı myqty balýandar boldy. Odan keıin Semeıde ótken jarysta da bes balýandy tize búktirdi.
Uly Abaıdyń 125 jyldyǵynda Shyńǵystaýdyń jaýyryny jerge tımegen ataqty balýany Dúrmekbaevty alyp urǵanda kózine jas alyp, kilemnen áreń túregelgeni esimizde. Jeńis aty aıtyp turǵandaı únemi jeńiske jetip júrdi. О́zi týyp-ósken Shubartaý aýdanynyń túıebalýany, chempıony boldy. Bet qaratqan joq. Semeı oblysy boıynsha da Jeńistiń aldyna túser balýandar az edi. 1967 jylǵy kúresten keıin Jeńisti kúres qoǵamynyń bastyǵy Almatyǵa shaqyrdy. «Almaty qurama qomandasyna alamyz, keıin shet elderge jarystarǵa shyǵasyń» degen eken. Alaıda Jeńis bara almady. Sol kezde barǵanda budan da bıik belesterdi baǵyndyrar ma edi», - deıdi balýannyń aýyldas aǵasy, kezinde birge kúresken Nurat Nazarbekov aqsaqal.
Azamat QASYM,
«Egemen Qazaqstan»
Shyǵys Qazaqstan oblysy,
Aıagóz aýdany,
Aıǵyz aýyly