Qazaq memlekettik qyzdar pedagogıkalyq ýnıversıtetiniń bitirýshi túlekteri úshin bos jumys oryndar jármeńkesi ótti. Sharaǵa 800-ge jýyq stýdent pen 100-ge jýyq jumys berýshi qatysty, dep habarlaıdy oqý ornynyń baspasóz ortalyǵy.
Jyl saıyn uıymdastyrylatyn dástúrli jármeńke jastarǵa búginde bilim berý oshaqtarynda qaı sala mamandaryna suranys kóp nemese tapshy ekendigin jáne eńbek ótilinsiz jumysqa ornalasýǵa bolatyndyǵyn anyqtaýǵa septesedi. Sondaı-aq, «Dıplommen – jumysqa» jobasyn júzege asyrýǵa múmkindik beredi.
– Elbasy Nursultan Nazarbaev «Qazaqstan joly – 2050: Bir maqsat, bir múdde, bir bolashaq» atty el halqyna arnaǵan Joldaýynda: «Álemniń ámirshisi – eńbek. Tek eńbekpen ǵana jemis ónbek, tek eńbek qana bar qıyndyqty jeńbek», deı kele, barlyq qazaqstandyqtardy memleket ıgiligi jolyndaǵy eńbekke shaqyrdy, búginde eńbek sheshýshi ulttyq faktor ekenin uǵyndyrdy, Jalpyǵa Ortaq Eńbek Qoǵamy ıdeıasyn usyndy. Álbette, Memleket basshysynyń bul strategııalyq tapsyrmasyn oryndaýda el jastarynyń róli zor. Prezıdent óz eńbekterinde jastar reformalardyń alǵy sapynda bolýǵa tıis jáne HHI ǵasyrda Qazaqstandy quratyn da, damytatyn da naq osy óskeleń urpaq ekenin erekshe atap kórsetti. Joldaýda júktelgen áleýmettik jańǵyrý jolyndaǵy naqty mindetterdi júzege asyrýda bul jármeńkeniń ózindik mańyzy bar ekendigin erekshe atap ótkim keledi. Is-shara jastar arasyndaǵy jumyssyzdyq máselesin sheshetin mańyzdy mehanızm bolyp tabylady, – dep atap ótti shara uıymdastyrýshylary.
Jármeńkege Almaty oblysy men Almaty qalasyndaǵy mektepke deıingi jáne orta bilim berý uıymdary qatysyp, óz mekemelerindegi bos jumys oryndaryn usyndy. Stýdentter bul múmkindikti paıdalanyp túıindemelerin joldady. Sondaı-aq, olar óz jetistikteri tirkelgen portfolıolarynyń kórmesin ótkizip, prezentasııa jasady.
– Bos jumys oryndar jármeńkesin uıymdastyrý jas mamandarǵa ǵana emes, jumys berýshiler úshin de mańyzdy. Jastar ózderin qyzyqtyratyn bos oryndar týraly málimet alýǵa, al bizder úshin túlekterdiń iskerlik qasıetin baǵalaýǵa múmkindik týdyrady. Osy taqylettes sharalar arqyly túlekterge aqparat bere alamyz. Orta mektepke qyzmetke ornalasqan jas mamanǵa tájirıbesi mol ustazdar baǵyt-baǵdar berip, jumysynyń qyr-syryn tereń meńgerýine árqashan qolushyn kórsetedi. Sondyqtan jastar jumys isteýge degen ynta-yqylas tanytsa, biz óz tarapymyzdan árdaıym qoldaý kórsetýge daıynbyz, – deıdi jármeńkege qatysýshy jumys berýshi.