Almatyda «Rýhanı jańǵyrý» baǵdarlamasy aıasynda Jambyl atyndaǵy kitaphana jastardyń zııatkerlik ortalyǵy retinde qaıta jasalyp, jańartyldy. Kúrdeli jóndeýden ótken kitaphanada kitaptarmen, elektrondy aqparatpen jumys isteýge, jańa shyǵarmalardy tanystyrýǵa, qujatty jáne ǵylymı- tanymdyq fılmderdi kórýge múmkindik beretin zamanaýı «open space» bólmesi jáne tegin «Wi-fi» men kofehana bar.
«Memleket basshysy atap ótkendeı, «Jańa gýmanıtarlyq bilimniń» alǵashqy oqýlyqtaryn tanystyrýda zamanaýı ult básekelestiginiń basty sharttarynyń biri – jas urpaqtyń bilimdiligi. Prezıdenttiń «Qazaqstan-2050 Strategııasyn qoldaý» qoǵamdyq qorynyń qarjylyq kómegi arqasynda bilim mekemelerin jańǵyrtýdyń jańa tásili júzege asty. Jobaǵa qatysqan almatylyq jastar klassıkalyq kitaphanany jastardyń kovorkıng ortalyǵymen oıdaǵydaı úndestire bildi», dep atap ótti qala ákimi Baýyrjan Baıbek.
Jańarǵan ınterermen qosa «Sıfrly Qazaqstan» baǵdarlamasyna saı kitaphananyń barlyq kitap qory sanalyp, elektrondy formatqa kóshedi. Bulardan ózge, qaıta jańǵyrǵan Jambyl atyndaǵy kitaphana jalpy kitap qory 1,8 mıllıon dana bolatyn qalanyń biregeı kitaphana júıesine endi. «Munda oqyrman qajetti aqparatty alyp qana qoımaı, óz pikirimen bólisip, ony talqylaı alady. Biz keńistikti zamanaýı jáne jaıly jasaýǵa tyrystyq. Bul oqyrmandarǵa qolaıly jaǵdaı týǵyzady», deıdi joba uıymdastyrýshylary.
Elvıra Serikqyzy, «Egemen Qazaqstan»
ALMATY