Aımaq basshysy Danıal Ahmetovtiń ókimimen ShQO ákiminiń birinshi orynbasary laýazymyna Erlan Qaparuly Aımuqashev taǵaıyndaldy. Bul týraly oblys ákiminiń baspasóz qyzmeti habarlady.
Jańa orynbasardy oblys ákimdigi aktıvine Danıal Ahmetov tanystyrdy. Erlan Qaparuly 1970 jyly 18 naýryzda Pavlodar qalasynda dúnıege kelgen. Pavlodar pedagogıkalyq ınstıtýtyn jáne Pavlodar ýnıversıtetin «Ekonomıst-menedjer» mamandyǵy boıynsha támamdaǵan.
Memlekettik qyzmette eńbek jolyn 2000 jyly Pavlodar oblysy ákimi isteri basqarmasynyń hattamalyq is-sharalarmen qamtamasyz etý bóliminiń bastyǵy qyzmetinen bastady. 2001 jyldyń jeltoqsanynan Pavlodar oblysynyń týrızm jáne sport departamentiniń bastyǵy, keıin Pavlodar oblysy ákiminiń kómekshisi mindetin atqarady. 4 jyl boıy Qazaqstan Respýblıkasy Premer-Mınıstriniń kómekshisi boldy. 2012 jyldyń naýryzynda Eýrazııalyq ekonomıkalyq komıssııanyń energetıka jáne ınfraqurylym boıynsha kollegııasy (Mınıstr) múshesi hatshylyǵynyń basshysy laýazymyna taǵaıyndaldy. 2015 jyly Shyǵys Qazaqstan oblysy ákiminiń apparatyn basqardy. 2016-2017 jyldar aralyǵynda О́skemen qalasy ákimi qyzmetin atqardy.
Azamat QASYM,
«Egemen Qazaqstan»
Shyǵys Qazaqstan oblysy