Aqtaý qalasynda jańa sporttyq nysan paıdalanýǵa berildi. Buǵan deıin esigin aıqara ashqan «Lions Fight Club» jaýyngerlik óner akademııasy jáne «Cross Fit Aktau» krossfıt zalynan soń, «Olympus» balet jáne sporttyq gımnastıka akademııasy ashyldy.
Buǵan deıin balet mektebi bolmaǵan Aqtaýda bul isti jas kásipker qolǵa aldy. Jas kásipker Amanjol Jańabaıdyń aıtýynsha, joba «Bıznestiń jol kartasy - 2020» memlekettik baǵdarlamasy aıasynda «Damý» kásipkerlikti damytý qorynyń qoldaýymen memlekettik-jeke menshik áriptestik aıasynda júzege asyrylyp otyr. Úsh sport zaldy turǵyzý úshin 360 mln. teńge jumsalǵan.
-Aqtaý qalasynda sporttyq gımnastıka sońǵy ret osydan 25 jyl buryn bolǵan. Endi akademııanyń ashylýymen biz bul máseleniń sheshimin taýyp otyrmyz, sebebi jastar arasynda gımnastıkaǵa degen qyzyǵýshylyq joǵary. Al balet bolsa bizdiń qalamyzda buryn múldem bolmaǵan. Negizinen, men buryn damymaı qalǵan sport túrlerin damytýdy qolǵa alý qajet dep esepteımin. Máselen djıý-djıtsý, erkin kúres MMA sport túrleri boıynsha qysqa merzimde nátıje shyǵarý úshin Daǵystan jáne Brazılııa elinen tájirıbeli bapkerlerdi aldyrtyp otyrmyz. Olar qazir Aqtaýda turyp jatyr jáne bolashaq chempıondardy daıyndaýda, deıdi kásipker Amanjol Jańabaı.
Jetim balalar men az qamtylǵan otbasylardan shyqqan balalarǵa úsh sport zalda tegin qatysý múmkindigi qarastyrylǵan.
Amanjol Jańabaı munymen toqtap qalǵysy joq. Ol mundaı sporttyq akademııalardy Jańaózen qalasy men Mańǵystaý aýdanynda ashý jónindegi usynyspen shyqqan. Alaıda, qalalyq jáne aýdandyq ákimdikterden áli jaýap joq. Biraq, kásipker óziniń jobasy jergilikti atqarýshy organdar tarapynan qoldaý tabatynyna senimdi.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy