Mundaı aqparatpen Almaty qalasynyń О́ńirlik kommýnıkasııalar qyzmeti alańynda ótken brıfıngte Almaty qalasynyń Tótenshe jaǵdaılar departamenti bastyǵynyń orynbasary Erlan Álibekov bólisip otyr.
Erlan Álibekulynyń sózine súıensek, Almaty qalasynyń aýmaǵy sel-tasqynǵa qaýipti, oǵan qosa Almaty qalasynyń mańaıynda 36 morenalyq kól bar, olardyń on jetisi buzylý qaýpi bar kól retinde belgilengen.
Jyl saıyn osy maqsat boıynsha jergilikti bıýdjetten, sondaı-aq, respýblıkalyq bıýdjetten qarjy bólinedi.
2017 jyly 9 buzylý qaýpi bar morena kólderin bosatý úshin birinshi ret dıametri 315 mm bolatyn sıfon qubyrlary (uzyndyǵy 1,5 shaqyrym), sondaı-aq Almaty qalasynyń Tótenshe jaǵdaılar departamentiniń bastamasy boıynsha 2016 jyly ákimdikten alynǵan saǵatyna 400 m.3 sý soratyn joǵary ónimdi sorǵylar qoldanyldy. Atqarylǵan jumystar nátıjesinde 4 kól tolyqtaı bosatyldy. Qalǵan kólderde sý deńgeıi 2-den 9 metrge deıin tómendedi. Jáne jergilikti bıýdjetten bólingen 13 mln. teńgege «Qazseldenqorǵaý» AQPB MM joǵary taýly sý beketterine 10 turǵyn úı modýli satyp alyndy.
Almaty qalasynyń Tótenshe jaǵdaılar departamenti Almaty qalasyn selden qorǵaý máselesin túbegeıli sheshý úshin 4 asa qaýipti ýchaskeni tekserdi. Olardyń ishinde bireýinde qorǵanys qurylymdary múldem joq bolyp shyqty. Bul kemshilikti joıý úshin tómendegide sharalar júrgizý qajet dep tanyldy:
– Úlken Almaty ózenniń joǵarǵy jaǵynan Aıýsaı ózeniniń tómengi jaǵyna deıin sel aǵyndy bóget qurylysyn júrgizý;
– Aqsaı ózenine sel aǵyndy bóget qurylysyn salý;
– Qoldanystaǵy Myńjylqy (Kishi Almaty) bógetin qaıta qurý;
Atalǵan ýchaskeler boıynsha 2016 jyly jergilikti bıýdjetten bólingen (169,1 mln.teńge) qarajatqa jobalyq- smetalyq qujattar jasaldy.
2017 jyly transfert tásilimen bólingen qarajatqa qoldanystaǵy Myńjylqy bógetiniń birinshi kezeńine qaıta jóndeý jumystary júrgizildi jáne GES-1 ÚAО́ avtojolyndaǵy qaýipti ýchaskelerge qorǵanys qurylystary salynyp, qaýipti aımaqtardaǵy asa qaýipti jerler nyǵaıtyldy. Myńjylqy bógetin qaıta jóndeýdiń 2-shi kezeńi 2018 jylǵa josparlanǵan.
Selge qaýipti Úlken Almaty ózeni arnasynyń sý jiberý múmkindikterin jaqsartý maqsatynda 2017 jyly respýblıkalyq bıýdjetten bólingen (11 mln. 858 myń teńge) qarjyǵa ózenniń aınalasyna ósken 2268 jabaıy aǵashtar men butalar kesildi. Sonymen qatar, búgingi kúni ózenniń tehnıkalyq jaǵdaıy kóńil kónshitpeıdi(aralas temirbeton qurylystary buzylyp, sonyń saldarynan sý aǵynynyń jyldamdyǵy turaqtandyrylmaıdy jáne sýdyń qaýipsiz ótýi qamtamasyz etilmegen). Sondyqtan qaıta jóndeýdi talap etedi.
Bul máselelerdi joıý úshin Almaty qalasynyń Tótenshe jaǵdaılar departamenti jobalyq- smetalyq qujattar úshin 2018 jylǵa jergilikti bıýdjetten 36,7 mln.teńge bólýge bastama kóterdi, – dep habarlady Erlan Álibekuly.
Aınash ESALI,
«Egemen Qazaqstan».
ALMATY