Eýropa Lıgasynyń fınalyna shyqqan qos komandanyń esimi belgili. О́z alańynda «Arsenaldy» jeńgen «Atletıko» Madrıd pen «Zalsbýrgten» basym bolǵan «Olımpık» Marsel 16 mamyr kúni Lıon qalasynda ótetin fınalda kezdesedi.
Alǵashqy oıynda óz múmkindigin paıdalana almaǵan «Arsenaldyń» eshkimge ókpesi joq. О́z múmkindigin ózi paıdalana almaı, jartylaı fınaldan keri qaıtty. Maýsym sońynda «Arsenaldyń» bas bapkeri Arsen Venger qyzmetinen ketetini belgili. Sońǵy oıynynda bir trofeı jeńip ketkisi kelgen ataqty bapkerdiń oıy iske aspaıtyn boldy. Eýrokýbokte 250 oıynda «Arsenaldy» alańǵa alyp shyqqan ańyz adamnyń klýbpen qoshtasýy da súreńsiz bolǵaly tur-aý.
Al «Atletıko» úırenshikti jaǵdaıda fınalǵa shyqty. Eýropa Lıgasyna beı-jaı qaramaıtyn Dıego Sımıone komandasy kezekti márte fınalǵa ótti. О́z alańyndaǵy oıynda Dıego Kostanyń soqqan jalǵyz goly ıspandardy aqtyq synǵa shyǵardy. «Vısente Kalderon» stadıonynda sońǵy 5 halyqaralyq oıyndy jeńgen madrıdtikter qaqpasyna gol da jibermeı keledi.
Ekinshi jartylaı fınaldyq match ta tartysqa toly boldy. Aýstrııanyń «Zalsbýrginen» mundaı tegeýrindi eshkim kútpegen bolatyn. Asyqpaı júrip 2 dop soqqan alań ıeleri «Marseldiń» apshysyn qýyrdy. Fransııalyqtar qarsylasty qalpaqpen uryp alamyz dep júrip, match sońynda qalbalaqtap qaldy. Teketirestegi esep teńesken soń, tóreshi qosymsha ekstra-taım jalǵady. Sóıtip 116 mınýtta qorǵaýshy Rolandý soqqan gol «Olımpıkti» fınalǵa alyp shyqty.
16 mamyr kúni Lıondaǵy «Stad de Lıon» stadıonynda fınalda osy týrnırdiń eki myqty ujymy baq synaıdy. Jeńimpaz komanda Eýropadaǵy eń aýyr, 15 kılo tartatyn kýbokty ıemdenedi. Sonymen qatar jeńimpaz komanda kelesi jyly Chempıondar lıgasynyń toptyq kezeńine top ete túsedi. Bul joldamaǵa «Atletıkodan» góri «Marsel» qatty qyzyǵyp otyr. Sebebi Rýdı Garsııanyń komandasy qazir Fransııa chempıonatynda 4-orynda keledi. «Monako», «Lıon» sekildi klýbtarmen Chempıondar lıgasynyń joldamasyna talasý qıyndaý ekenin jankúıerleri de jaqsy túsinedi. Tarıhtan keltirer bolsaq, 1999 jáne 2004 jyldary «Marsel» fınalǵa shyǵyp, ekeýinde de jeńilis tapqan edi. Endi fransýzdar «er kezegi úshke deıin» dep otyr. Al «Atletıko» 2010 jáne 2012 jyldary Eýropa Lıgasyn utyp aldy.
Ermuhamed MÁÝLEN, «Egemen Qazaqstan»