Jaqynda «Rýhanı jańǵyrý» baǵdarlamasy aıasynda Qaraǵandydaǵy «Molodejnyı» mádenıet úıinde «Babalar sózi» folkorlyq festıvali ótti. Halyqtyń rýhanı asyl qazynasyn jınaqtaý, nasıhattaý jáne keleshek urpaqqa jetkizý syndy ıgi isterdi maqsat ekten festıval joǵary deńgeıde uıymdastyryldy.
Sharada ulttyq folklorlyq muralarymyzdy jınaqtap, saqtap júrgen eresekter men jastar án, bı, áýen saıysynda óz daryndaryn ashyp kórsetýge múmkindik aldy. Qatysýshylardyń jas erekshiligi de aýqymdy boldy: 5 jastan 70 jasqa deıingi aralyq qamtyldy.
Bul folklorlyq festıval mýzyka, bı, án arqyly halyqtyń atam zamanǵy óner tájirıbesiniń tamasha kórinisi boldy. Merekege qatysýshylar, ıaǵnı jastar jaǵy bar ónerin salyp, óz isiniń kásibı mamandary retinde daryny men sheberlikterin halaıyq aldynda pash etti.
Festıval barysynda sheberlik sabaǵy, mektepter arasynda asyq atýdan jarys, kúsh synasý básekeleri ótkizildi. «Baldyrǵan» bóbekjaıynyń «Syldyrmaq» hory, «Botaqan» vokaldyq toby, «Altyn batyr» step-mektebi óz ónerlerimen kópshilikti tánti etti.
Ulttyq kıimder, kóne saryndar qatysýshylardy ata-ájelerimizdiń zamanyna oısha qaıta oralýyna múmkindik berdi. Jas býyn urpaqtan-urpakka amanat etip jetkizilgen salt-dástúrlerimizdi, týǵan el tarıhyn bilip, erteden qalǵan turmys zattarymen tanysýǵa múmkindik aldy.
«Babalar sózi» folklorlyq festıvali qatysýshylardy ótken kúnderge oraltyp, bolashaqtyń mańyzdylyǵyn baǵalaýǵa septigin tıgizdi.
Qaırat ÁBILDA, «Egemen Qazaqstan»
QARAǴANDY