At ústindegi tarıhı- tanymdyq top múshelerin oblystyq máslıhat depýtaty Oral Sartaev bastap barady. Maqsat-jalpy elimizdiń óńirlerin, aýyldaryn atpen aralaýǵa bolatynyn kórsetý. Jastarmen kezdesip, ulttyq at sporty túrlerine qyzyqtyrý.
Top «Rýhanı jańǵyrý» baǵdarlamasy aıasynda qasıetti jerlerdi aralaý maqsatynda jolǵa shyqty.
Byltyr «Alash» partııasynyń 100 jyldyǵyna oraı «Ulylarǵa taǵzym» atalatyn atty ekspedısııa Júsipbek Aımaýytov, Jumat Shanın aýyldaryna baryp, taǵzym etti. Aımaýytov aýylynda kókpardan jarys ótkizdi. Osy aýyldardaǵy Kúreńbaı synshynyń zıraty, Qabylbek, Qaziret qorymdaryna, Maıly tondardyń eski zıratyna, Nurǵalı mollanyń medresesi bolǵan orynǵa, Qosym Pishembaevtyń zıratyna duǵa oqydy.
Aýdandyq mádenıet jáne tilderdi damytý bóliminiń habarynsha, bıyl ekspedısııa Jańatilek aýylyndaǵy Jaıaý Musanyń zıraty, Totııa ana zıraty, Qazybek bıdiń sóre tasy, Qundykól aýylyndaǵy Ábjalap dıýana, Túrkilerdiń tabyný ornyna, Máshhúr Júsiptiń kesenesi, Jylandy qystaǵyndaǵy Abaı-Dilda qajy zıratyna baryp táý etip, kerekti málimetter jınap, sýretke túsiredi. 6 mamyr kúni jol tússe Eskeldi aýylynan shyǵyp, Ekibastuzdyń Á. Marǵulan aýylyna jetedi. 8 mamyr kúni Boztal aýylynan aýdan ortalyǵy Ereımentaýǵa jetedi. Atty ekspedısııada 6 adam bar. Atty sapar 5-11 mamyr aralyǵyna arnalǵan.
Farıda Byqaı,
«Egemen Qazaqstan»
Pavlodar