Taldyqorǵanda Jeńis kúnine oraı soǵys jáne eńbek ardagerleri úshin saltanatty qabyldaý ótti. Bul sharaǵa aımaqtan 200 ardager shaqyryldy. Maıdangerlerdi Taldyqorǵan áskerı garnızonynyń orkestri marshpen qarsy alyp, olarǵa gúl shoqtary men estelik syılyqtar tabys etildi.
Qatary kemigen qart maıdangerlermen kezdeesi dástúrli túrde, jyl maıyn ótip keledi. Bıylǵy kezdesý soǵystaǵy Jeńiske arnalǵan derekti fılm kórsetýden bastaldy. Al ardagerlerdi quttyqtaǵan oblys ákimi Amandyq Batalov maıdangerler men tyl eńbekkerleriniń búgingi beıbit ómirge jetý jolyndaǵy úlken úlesin erekshe atap ótti.
- Barshańyzdy Jeńis kúnimen shyn júrekten quttyqtaımyn! Sizderdiń densaýlyqtaryńyz ben turmystaryńyzǵa qamqorlyq kórsetý – Prezıdentimiz Nursultan Nazarbaevtyń óńir basshylarynyń aldyna qoıǵan mindetteriniń biri. Densaýlyqtaryńyz kútimde, ǵumyrlaryńyz ıgilikti bolýy úshin, aman-esen ortamyzda júrip, eldiń ósip-órkendegenine kýá bolýlaryńyz úshin biz barlyq jaǵdaıdy jasaýǵa tyrysamyz. Elimizdiń búgingideı jetistikterge jetýine sizderdiń qosqan úlesterińiz zor. Oblystyń áleýmettik-ekonomıkalyq damýyn syrttaı baqylap, qajet jerinde aqyl qosyp, únemi qoldap otyrasyzdar, sol úshin sizderge alǵysymdy bildiremin. Sizderge myqty densaýlyq tileımin, 100 jaspen shektelmeı odan da uzaq ǵumyr keshińizder, - dedi aımaq basshysy.
Sóz kezegin alǵan ardagerler de aǵynan jarylyp, azamatarǵa aq batasyn berdi. Qazir Jetisý jerinde kózi tiri 138 soǵys ardageri turady eken. 12 myńǵa jýyq tyl eńbekkeri taǵy bar. Jeńis kúnine oraı oblystyq bıýdjetten árbir soǵys ardagerine 150 myń teńge kóleminde birjolǵy materıaldyq kómek kórseteldi.
Soǵys ardageri Sársenbaı Qańtarbaı aqsaqal oblys tarapynan maıdangerlerge kórsetilip otyrǵan qoldaý men kómekke dán rıza. Taldyqorǵan qalasynda turatyn Sársenbaı qarııa I jáne II dárejeli «Uly Otan soǵysy» ordenderi, «Erligi úshin» medali jáne basqa da nagradalarmen madaqtalǵan. Ardager beıbit ómirdegi eseli eńbegi úshin de birqatar marapattarǵa ıe bolǵan.
Jetisýdyń taǵy bir erjúrek ardageri, 96 jastaǵy Ábish Oshaqbaıulynyń tilegi el ústinde. Otanymyzdyń álemge tanylyp, beıbit tirlik keshýi qazaq halqynyń birliksúıgish minezi men Elbasynyń salıqaly basqaraýynyń jemisi dep sanaıdy. Ardager osy tirliktiń irgesi buzylmasyn dep tileıdi. О́zi maıdandaǵy erligi úshin Qyzyl Juldyz, I dárejeli Otan soǵysy, Qurmet belgisi ordenderimen, «Germanııany jeńgeni úshin», «Stalıngradty azat etkeni úshin», «Maıdandaǵy erligi úshin» medaldarymen marapattalǵan.
Aıtpaqshy, bıyl oblys tarapynan ardagerlerge jáne eńbekkerlerdiń shıpajaılarda tegin emdelýine jaǵdaı jasalyp, ol úshin 187,5 mln teńge qarjy bólinip otyr. Munan bólek ekinshi Dúnıejúzilik soǵysqa qatysýshylar men maıdan múgedekterin qosalqy jáne kómekshi quraldarmen qamtý úshin bıýdjetten 2 mlrd 830 mln teńge, al kommýnaldyq qyzmetterge 16 mln teńge qarjy taǵy qarastyrylǵan. Qysqasy Almaty oblysynda qatary sıregen qarttarǵa jasalatyn qamqorlyq legi tolastamaıtyn bolady.
Qalmahanbet MUQAMETQALI,
«Egemen Qazaqstan».
Almaty oblysy.