Almaty oblysynyń Mádenıet, arhıvter jáne qujattama basqarmasy men B.Rımova atyndaǵy Taldyqorǵan drama teatry osydan bir jyl buryn Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasy aıasynda respýblıkalyq "El tarıhy-Jer tarıhy" dramalyq shyǵarmalar baıqaýyn jarııalaǵan bolatyn.
Jaqynda baıqaýdyń qorytyndysy shyǵyp, saltanatty marapattaý rásiminde jeńimpazdar anyqtaldy. Baıqaýǵa qatysqan shyǵarmalardy taldap, ádil baǵalaryn klassık jazýshy, dramatýrg, QR Memlekettik syılyǵynyń laýreaty Dýlat Isabekov, «О́nertaný» ǵylymdarynyń kandıdaty, teatr synshysy Anar Erkebaı men aqyn, Halyqaralyq «Alash» syılyǵynyń laýreaty, oblystyq «Jetisý» gazetiniń bas redaktory Ámire Árin berdi. Aıta ketetin jáıit, mundaı dramalyq shyǵarmalar baıqaýy teatrdyń uıymdastyrýymen alǵash ret ótkizilip otyr. Baıqaýǵa jalpy sany 8 dramalyq shyǵarma qatysyp, onyń 6 marapattaldy. Baq synasqandar ishinde Almaty oblysynan, Almaty, Semeı, О́skemen qalalarynan qalamgerler boldy.
Kórermenniń sana-sezimin sóz ben áreket arqyly birneshe saǵat baýrap, kózin sahnaǵa qadaltar qareket, jandúnıesin tebireniske túsirer qaqtyǵys tabý - qıynnyń qıyny ekeni belgili. Degenmen de Dýlat Isabekov tóraǵalyq etken baıqaýǵa qatysqan qalamgerlerdiń qabilet-qarymyn qazylar alqasy joǵary dep baǵalady. Baıqaýdyń ataýymen talaptaryna sáıkes pesalar Jetisý ólkesinde bolǵan tarıhı oqıǵalar men tarıhı tulǵalar jaıynda jazylǵan. Kórkemdik, mazmundyq deńgeıine qaraı eń úzdik dep tanylǵan dramalyq shyǵarma Orbulaq shaıqasynyń 375 jyldyǵyna arnalyp jazylǵan Qolǵanat Murattyń «Orbulaq» tarıhı dramasy boldy. Bas júldeni ıelengen bul shyǵarma arnaıy dıplommen 700 000 teńge aqshalaı sertıfıkatqa ıe boldy. Sondaı-aq 1-shi oryn Ulpan Toqaeva, 2-shi oryn Zámzágúl Sarnoqasova, 3-shi oryn Alısher Aıtýar syndy jas qalamgerlerge buıyrdy. Musa Janádilov pen Aıjaryq Sultanqoja syndy qalamgerler belsendi qatysqany úshin dıplomymen 100 000 teńge aqshalaı sertıfıkattar aldy. Jáne eń mańyzdy jańalyq B.Rımova atyndaǵy Taldyqorǵan drama teatrynyń ádebı qory sý jańa, áli sııasy keppegen 6 dramalyq shyǵarmamen tolyǵyp, bas júldeni ıelengen «Orbulaq» tarıhı dramasy keler jyly teatrda qoıylady.
Osyndaı nátıjemen aıaqtalǵan bul baıqaý keler jyly da óz jalǵasyn tabady degen úmittemiz. Qazaq ádebıetiniń qory tarıhı shoqtyǵy bıik týyndylarmen tolyǵyp, sahna arqyly halyqqa jetse, naǵyz rýhanı jańǵyrý sol bolsa kerek-ti.
Murat Qolǵanat, bas júlde ıegeri:
- Bir jyl boıy Jetisýdyń baı tarıhyn, myqty tarıhı tulǵalaryn biraz zerttep, Orbulaq shaıqasy týraly jazaıyn dedim. Nege? Sebebi mundaı iri tarıhı oqıǵalar teatr arqyly, kıno arqyly bolsyn jańǵyryp, jas urpaqtyń sanasyna jazylý kerek. Táýelsizdigimizge áser etken tarıhı-saıası oqıǵalardyń eń mańyzdylary osy qasıetti Jetisýda bolǵan. Orbulaq shaıqasynyń 375 jyldyǵyna tartý etip otyrǵan bul shyǵarmany jazý úshin izdenip, ǵylymı zertteýlerdi oqyp túsingenim, keler urpaǵy úshin qan keship, beıbit zaman úshin jan bergen batyrlarymyzdyń orasan eńbekteri, tarıhı oqıǵalardyń mańyzdylyǵy, baǵasy halyqqa tolyq jetpeı, eskerýsiz qalyp jatady. Sondyqtan da mundaı tarıhı oqıǵa sahna arqyly halyqqa, jas urpaqqa jetsin degen maqsatta jazdym. Bas júlde alamyn dep oılamadym. Ádil qazylar alqasyna, Almaty oblysy ákimdigine, oblystyq Mádenıet basqarmasyna, B.Rımova atyndaǵy Taldyqorǵan drama teatrynyń ujymyna sheksiz alǵysymdy bildiremin.
Monshaq BEKAIDAR.
Taldyqorǵan qalasy.