Mereke qarsańynda Qazaqstan Respýblıkasy Premer-Mınıstriniń orynbasary Asqar Jumaǵalıev jumys saparymen Almatyǵa keldi. Issapar barysynda vıse-premer birqatar nysandardy aralap, elimizdegi elektrondy saýda jáne IT salasyn damytýǵa baǵyttalǵan keńes otyrysyna qatysty.
Úkimet basshysynyń orynbasary aldymen Qazposhta qyzmetiniń Almatyda jańadan ashylǵan sıfrly keńsesin aralady. Mundaǵy zamanaýı talapqa saı qurylǵylar men kelýshilerdi barlyq aqparatpen qamtamasyz ete alatyn aqyldy robottardyń qyzmetimen tanysty. Jańa keńsede sálemdeme jiberý, qabyldap alý, halyqqa onlaın qyzmet kórsetý, aqsha aýdarymdary men koll ortalyǵymen baılanys tárizdi birneshe qyzmet túrleri kórsetiledi. Sońǵy ýaqyttary qazposhtadaǵy sıfrly júıeler adam kúshimen qatar jumys ónimdiliginiń artýyna da septigin tıgizgen. Buǵan mysal, júk tasymaldaý kólemi burynǵyǵa qaraǵanda 33 paıyzǵa artqan. Oǵan qosa poshta sálemdemelerin áýe tasymaly arqyly jetkizetin zamanaýı drondar da jumysty birshama jeńildetip otyr.
Drondardy testileý sharasyna qatysqan Asqar Jumaǵalıev: «Bul tehnologııalar «Sıfrly Qazaqstan» baǵdarlamasy aıasynda óte mańyzdy. Sebebi, shalǵaıdaǵy turǵyndarǵa jańa merzimdi basylymdardyń kúnbe-kún jetip turǵany óte qajet. Atalǵan jobanyń arqasynda jetkizý ýaqytyn, jol shyǵyndaryn únemdeýge bolady» dep tyń jobaǵa oń baǵasyn berdi.
– Byltyr alys aýdandarǵa sálemdeme jetkizýge múmkindik beretin arnaıy drondardy iske qosqan bolatynbyz. Osy tehnologııalardyń arqasynda alys aýyldarǵa gazet-jýrnaldar kúnbe-kún jetkizilip turdy. Bul drondar 20 myń shaqyrymǵa jýyq qashyqtyqqa ushyp úlgerdi. Bıyldan bastap birden 4 kıloǵa deıin júk kótere alatyn drondardy testilep jatyrmyz. Ázirge jańa drondar bir baǵytta 70 shaqyrymǵa deıin usha alady. Qazirgi tańda Almaty, Qaraǵandy, Aqmala, OQO aýmaǵyndaǵy 30 aýyl sálemdemelerdi dron arqyly alyp otyr. Jyl sońyna deıin 159 eldi mekendi qamtý josparda bar, – deıdi «Qazposhta» AQ Basqarma tóraǵasy Sáken Sársenov.
Sondaı-aq, A. Jumaǵalıevtiń basshylyǵymen e-kommersııa jáne blokcheın máseleleri boıynsha Qazaqstan Respýblıkasynyń Ulttyq Banki, memlekettik organdar, ekinshi deńgeıdegi bankter, uıaly baılanys operatorlary ókilderiniń jáne IT qoǵamdastyǵy ókilderiniń qatysýymen arnaıy keńes ótti.
Onda vıse-premer mınıstrge «Invest Online» atty elektrondy ınvestısııalyq joba tanystyryldy. Júıeni tanystyrý kezinde Ulttyq Bank Tóraǵasynyń orynbasary Janat Qurmanov «Invest Online» ınvestısııalaýǵa arnalǵan jańa tehnologııalyq ónimdi bildiretindigin, ony qurý kezinde «blokcheın» tehnologııasy qoldanylǵandyǵyn atap ótti.
«Halyq úshin Ulttyq Banktiń qysqa merzimdi nottary shyǵaryldy jáne júıe iske qosylǵan sátten bastap 59 mln. teńge somaǵa 641 myń not satyp alyndy», - deıdi J. Qurmanov. Bul ónimdi Qazaqstan Respýblıkasynyń kez kelgen azamaty paıdalana otyryp, úıden shyqpaı-aq qashyqtan alý tásilimen baǵaly qaǵazdardy satyp ala alady. Basqosý barysynda memlekettik organdar densaýlyq saqtaý salasynda QQS basqarý kezinde elektrondyq astyq qolhattary júıesinde «blokcheın» tehnologııasyn qoldaný boıynsha jobalyq sheshimderdi usyndy.
«Búgin blokcheın tehnologııasy jáne jasandy zerde negizinde ázirlengen sheshimder men jobalar usynyldy. Bul ámbebap, qolaıly tetikter, olardy búkil Qazaqstandyqtar paıdalana alady. Osyndaı jobalardy iske asyrý bıznesti, onlaın-saýdany yntalandyrady. Qazaqstandyqtarǵa kórsetiletin qyzmetterdiń mol aýqymy qoljetimdi bolady.» - dedi QR Premer-Mınıstriniń orynbasary A. Jumaǵalıev.
Arman OKTIаBR,
«Egemen Qazaqstan»
ALMATY