Soǵys ardageri Altynaı Esbolatovanyń esimi Jetisýdiń eńkeıgen qarty men eńbektegen balasyna deıin máshhúr. Jerlesteri ol kisini «Parovoz apa» dep ataıdy.
Altynaı apa áıgili Mataı stansynda týyp-ósti. Bul stansany áıgili dep ataýymyzdyń syry bar, sol soǵys jyldarynda Mataıdyń deposynda orys ónertapqyshy Mıhaıl Kalashnıkov alǵashqy avtomatty atys qarýyn oılyp taýyp, qurastyrǵan bolatyn. Túrksib temir jolynyń negizgi bólimi retinde shaǵyn stansada tirshilik kórigi sýyǵan emes. Ásirese, soǵys jyldarynda Orta Azııadan maıdan shebine attanǵan sostavtar leginde san joq edi. Jastaıynan temirjoldyń tarsyly men parovozdyń ashy daýsyna qulaǵynyń quryshy qanǵan Altynaı Esbolotova on toǵyz jasynda mashınıstiń qysqa merzimdi oqýyn oqyp, paravozdyń basqarý tiziginin qolyna aldy. Osylaısha áskerı poıyzdyń mashınısi atanǵan qazaqtyń jas qyzy aýyr sostavty súıregen paravozdyń kabınasynda alǵy shepke kete bardy. Stalıngrad túbindegi maıdanǵa áskerı tehnıka, adam kúshi, azyq-túlik jetkizip, keri oralǵanda aýyr jaralanǵan jaýyngerlerdi tasıtyn edi.
Qazir toqsannan jasy asqan «Paravoz apa» Taldyqorǵan qalasynda turady. Tek ol kúnder týraly áńgimege qasań. Jalynǵa oranǵan jastyǵy men el kúızelgen kezeńdi esine túsirýden boıtartatyn bolar. Esine búgingi baqytty urpaqqa únemi bata berip, Táýelsiz eldiń tileýin tilep otyrady.
...Almaty oblysynyń ákimi Amandyq Batalov Taldyqorǵanda turatyn soǵys ardagerleriniń úıin bas suǵyp, qart maıdangerlerdi quttyqtap shyǵýdy dástúrge aınaldyrǵan. Kúni keshe osy úrdispen úı aralaǵan ákim Altynaı apanyń da tabaldyryǵynan attady. Ákimniń qadamyna razy bolǵan ardager áńgime tıegin aǵytty. Maıdandaǵy jyldardy esine alyp, soǵysta jeńiske jetkizgen Otanǵa degen sheksiz súıispenshilik pen birlik ekenin eskerti. Osy kezde bir top oqýshy da «Paravoz apany» quttyqtap kele qalǵan-dy. Apa balalarǵa batasyn berdi.
- Jaqsy oqyńdar, tárbıeli bolyńdar, ata-analaryńnyń qýanyshy, Otannyń tiregi bolyńdar. Bilim – barlyq ıgiliktiń kilti. Qolda bar nárseni qadirleı bilý kerek, bar múmkindikti paıdalana bilý kerek. Balalardyń biz kórgen qıyndyqty kórmeı, bolashaqtary jarqyn bolýyn tileımin! – dedi Altynaı apa balǵyndardyń basynan sıpap.
Sózin jalǵaǵan ardager apa oblys ákimine qarata:
- Osy kúnge jetkenime shúkirshilik etemin. Qazir halyq beıbitshilik pen tynyshtyqta jaqsy ómir súrip jatyr, kıimi kók, qarny toq. Sondyqtan Elbasymyzǵa rızamyn.Osyny jetkizersiń. Barlyǵyńa zor densaýlyq tileımin, - dedi.
Qalmahanbet MUQAMETQALI,
«Egemen Qazaqstan»
Almaty oblysy