О́tken jeksenbi kúni Qazaqstan men álem boks jankúıerleri osy kóktemniń negizgi jekpe-jegi sanalǵan Gennadıı Golovkın men Saýl «Kanelo» Alvares arasyndaǵy aıqasty kórýi tıis bolatyn. Alaıda belgili sebepterge baılanysty Golovkın meksıkalyq boksshynyń ornyna arǵy tegi armıan, AQSh azamaty Vanes Martırosıanmen judyryqtasty.
AQSh-tyń Karson qalasyndaǵy StubHub Center arenasynda ótken kezdesý nebary eki raýndqa ǵana sozyldy. Jekpe-jektiń ekinshi raýndynda otandasymyz qarsylasyn nokaýtpen jeńip, kásipqoı bokstaǵy 38-shi jeńisine qol jetkizdi. Al Martırosıan karerasyndaǵy tórtinshi jeńilisine ushyrady.
Jekpe-jek basynda Vanes ózine tym senimdi qımyldap, ashyq aıqas kórsete bastady. Tipti onyń eki djeb soqqysy otandasymyzdyń qorǵanysyn buzyp-jaryp, dittegen jerine de jetti. Otandasymyz Vanestiń erkin kósilýine múmkindik berdi. Tipti alǵashqy raýndtyń sońǵy sekýndtarynda armıan boksshysynyń kenetten uıymdastyrǵan serııalyq soqqylary Golovkındi kútpegen jaǵdaıǵa qaldyrdy. Osylaısha, Vanes alǵashqy raýndta jekpe-jekti óz paıdasyna sheshti. Tóreshilerdiń sheshimi boıynsha da, ol birinshi raýndta 9:10 upaımen basym tústi.
Al ekinshi raýnda jankúıerler sharshy alańda múlde basqa Golovkındi kórdi. Raýnd bastala sala jekpe-jekke shyndap kirisken otandasymyz qarsylasyn soqqynyń astyna aldy. Sondaı sátterdiń birinde Gennadııdiń birneshe soqqysy qarsylasyna dóp tıip, amerıkalyq boksshy tizerlep otyryp qaldy. Alaıda tóreshi bul sátti nokdaýn dep eseptegen joq.
Golovkın jankúıerlerge nokaýtty kóp kúttirgen joq. Ekinshi raýndtyń orta tusyna kelgende ol kóp soqqyly kombınasııa uıymdastyrdy: sol qolymen eki djeb, tikeleı eki túzý soqqy, sol, oń jáne sol qolymen kezekti soqqy jasap, qarsylasyn nokaýtqa túsirdi. Tóreshi Martırosıan ózine kelip alý úshin 10 sekýnd sanaǵanymen, ol ornynan tura almady. Sóıtip kópten kútken jekpe-jek tórt jarym mınýtqa ǵana sozyldy.
Bul kezdesýde Gennadıı Golovkın óziniń WBA tıtýlyn 19-shy, WBC beldigin tórtinshi jáne IBO tıtýlyn 17-shi ret qorǵady. Taǵy bir aıta ketetin jaıt, Golovkın osydan dál 12 jyl buryn, ıaǵnı 6 mamyr kúni Germanııada óziniń kásipqoı bokstaǵy alǵashqy kezdesýin vengrııalyq boksshy Gabor Balogqa qarsy ótkizip, birinshi raýndta nokaýtpen jeńgen-di.
Kezdesýden soń Vanes Martırosıan jýrnalısterge jekpe-jek týraly pikirin aıtyp berdi. «Quddy poıyzdyń astynda qalyp qoıǵandaı boldym. Onyń bir ǵana emes, barlyq soqqysy maǵan óte aýyr tıdi. Buǵan deıin meni eshkim bulaı qatty soqqynyń astyna almaǵan edi. Golovkın – sumdyq pancher. Árbir soqqysy myǵym ári joıqyn «Kanelonyń» álgi etti ne úshin jegenin endi túsindim», dedi Martırosıan.
Al Golovkın kezdesýden keıin ózin jaqsy sezingenin aıtady. «Meni qoldaǵan barsha qazaqstandyqtarǵa, dostaryma alǵysymdy aıtamyn. Vanes – myqty boksshy. Birinshi raýnda jasaǵan birneshe soqqysy dál tıgende jekpe-jek qıynǵa soǵady dep oıladym. Biraq ekinshi raýndta bári sátti aıaqtaldy. Jankúıerlerim úshin Sınko de Maıo merekesine keremet syı jasadym», dedi Golovkın.
Sonymen qatar Golovkın aldaǵy aıqasyna jaqsy qarsylas izdeıtinin málimdedi. «Qyrkúıekte «Kanelomen» qarymta kezdesý deısiz be? Ol daıyn bolsa, men daıynmyn. Kimmen bolsa da judyryqtasýǵa kúshim jetedi. Toǵyz jyl boıy chempıonmyn. Jigitter, qoldaryńnan kelse, beldigimdi alýǵa tyrysyp kórińder», dep málimdedi ol.
Dál qazir jankúıerler Golovkınmen jekpe-jekke shyǵýy múmkin bolǵan naqty úsh boksshynyń esimin ataıdy. Olar: Saýl Alvaers (Meksıka), Bıllı Djo Sonders (Brıtanııa) jáne Sergeı Derevıanchenko (Ýkraına).
Golovkın-Martırosıan jekpe-jegine tikeleı efırde kommentatorlyq jasaǵan bokstan Afına Olımpıadasynyń chempıony Baqtııar Artaevtyń paıymdaýynsha, Gennadıı Golovkınniń kelesi qarsylasy brıtanııalyq Bıllı Djo Sonders bolýy múmkin. «Qazir Sonderste Golovkınge jetpeı turǵan WBO beldigi bar. Sondyqtan Golovkınge aldaǵy ýaqytta brıtanııalyq boksshy qarsylas atanýy múmkin. Sebebi, Sonders Golovkınmen kezdesetin bolsa, úlken qarjyǵa keneletini anyq. Bıllı Golovkınmen kezdesken jaǵdaıda, ol otandasymyzǵa asa qıyndyq týǵyza qoımaıdy. О́ıtkeni Sonderstiń soqqysy aıtarlyqtaı joıqyn emes», deıdi Olımpıada chempıony.
Al otandasymyzdyń jattyqtyrýshysy múlde basqa pikirde. Onyń aıtýynsha, Golovkın-Sonders jekpe-jegi ótpeýi de múmkin. Sebebi brıtanııalyq boksshy otandasymyzben judyryqtasýy úshin óte iri kólemdegi gonorar talap etýde.
«Sonders Golovkınmen eshqashan jekpe-jek ótkizbeıdi. О́ıtkeni ol óte kóp somada qarjy talap etýde. Mysaly, Sonders Denıel Djeıkobspen rıngte kezdesýi úshin jeti mıllıon dollar suraǵan. Osydan-aq oılaı berińiz, ol Golovkınmen shyǵý úshin qansha qarajat suraǵanyn. Sondyqtan, biz WBO beldigin ala almaımyz. Golovkınniń ózine de dál qazir bul beldik asa qajet te emes. Golovkınniń kelesi qarsylasy kim bolýy múmkin degen suraqqa kelsek, bizde birneshe nusqa bar. Olar: Mýrata, Djeıkobs, Charlo jáne Derevıanchenko. Sondaı-aq «Kanelomen» qarymta kezdesý ótkizgimiz keledi. Bul aıqas biz úshin qarjylyq jaǵynan emes, kim myqty anyqtaý úshin tıimdi», deıdi Sanches.
IBF talaby boıynsha, Golovkın aldaǵy 90 kúnniń ishinde ýkraınalyq Sergeı Derevıanchenkomen jekpe-jekke shyǵýy tıis. Eger Derevıanchenkomen jekpe-jekke shyqpasa, IBF Golovkınnen chempıondyq belbeýdi qaıtaryp alatynyn málimdegen. Martırosıanǵa qarsy jekpe-jekten soń Golovkınniń komandasy IBF uıymynan beldikti qorǵaý merzimin taǵy da shegerýin suraǵan. Biraq IBF álem chempıony ataǵyn qorǵaý úshin ekinshi ret jekpe-jekti keıinge shegermeıtini anyq.
Golovkınniń komandasyn alda óte mańyzdy tańdaý kútip tur. Alvares, Sonders nemese Derevıanchenko. Otandasymyzdyń promoýteri Tom Lefflerdiń aıtýynsha, Golovkın endi kúz mezgilinde judyryqtasady jáne ol úshin ógizdi de óltirmeıtin, arbany da syndyrmaıtyn tıimdi jol taýyp beretinin aıtty.
Álı BITО́RE,
«Egemen Qazaqstan»