Áskerı qyzmetshi Ǵalymjan Áleýhanov erjúrektigin kórsetip, eldiń alǵysyna bólendi. Oılamaǵan jerden órtenip jatqan úıge shatyr arqyly engen efreıtor eki birdeı baldyrǵandy ólim aýzynan aman alyp qaldy.
Ǵalymjan Meıirhanuly Kentaý qalasyndaǵy №4 Atatúrik atyndaǵy mektep-lıseıiniń túlegi. Mamandyǵy ınjener. Búginde Almaty qalasyndaǵy Áskerı-shabýyldaýshy desanttyq bóliminde kelisimshart boıynsha jumys isteıdi.
Áskerı qyzmetshi úıge qaıtyp kele jatqanda kóp qabatty turǵyn úıdiń joǵarǵy qabaty janyp jatqanyn kóredi. Ýlap-shýlap jatqan jurt. Abyr-sabyr halyq. Al Ǵalymjan órt sóndirýshilerdi kútpeı-aq asyǵys kómekke umtyldy. О́ıtkeni ýaqyt tar. О́rtengen úıde adam bolsa kómek qolyn sozý qajet degen oı boıyn shymyrlatty. Jas jigittiń jyldam qımyldaǵany da sol. Qazir órt satysymen joǵarǵy qabatqa kóterilip, mansardtyq shatyrdan tómen túsý kerek dep oılady. Ol esikten ishke enip, tútin tumshalanǵan bólmelerdi aralap shyqqanda es-tússiz jatqan eki baldyrǵandy bir-birlep kótergen kúıi syrtqa qaraı umtyldy. Tilsiz jaý qaraıtyn túri kórinbeıdi. Asyqpasa bolmaıdy. Túpki bólmede álsirep, únsiz jatqan qos sábıdi tez kóterip alady da syrtqa shyǵarady. Osylaısha de- santtyq shabýyldaý-áskerlerine qarasty 61993 áskerı bóliminiń áskerı qyzmetshisi, efreıtor Ǵalymjan Áleýhanov órt ishinde qalǵan baldyrǵandarǵa ómir syılady.
Arada ýaqyt ótti, bári de umytylǵan da edi. Ol bul oqıǵany eske alýǵa da yńǵaısyzdanady.
– Meniń jasaǵanym batyrlyq emes qoı, – dep jymııady Ǵalymjan. – Kez kelgen adam jasaýǵa tıisti is emes pe? Áskerı nemese qaı saladaǵy adam bolsyn mańyzdy emes. Bastysy, qıyn jaǵdaıda qol ushyn sozý paryzyń dep oılaımyn. Eń aldymen 61993 áskerı bólimniń komandıri podpolkovnık Bolat Dúısembaevqa bólimde ótkiziletin sabaqtary úshin shyn kóńilden alǵysymdy bildirgim keledi. Solardyń arqasynda barlyq desantshy jaýyngerler ekpindi isterdiń aldyńǵy sapynda júrgenine qýanamyn. Bul maǵan kádege jarady dep oılaımyn.
– Biz Ǵalymjanmen maqtanamyz, – deıdi Kentaý qalalyq Jastar resýrstyq ortalyǵynyń dırektory Qanat Bekmetov. – Onyń erligi jastarǵa qashanda úlgi ári ónege bolary anyq. Jastar da erjúrek Ǵalymjan Meıirhanulyndaı bolǵysy keletini biz úshin de maqtanysh. Laıym, órenderimiz ónegeli isterimen óse bersin. «Qazaqstannyń 100 jańa esimi» jobasynyń jeńimpazy atanýymen quttyqtaımyz. Mereıiń óse bersin, órt kezinde janqııarlyqpen erlik jasap, óz ómirińizdi táýekelge tigip, baldyrǵandardyń ómirin saqtap qal-ǵan beıbit kúnniń batyry!
balalardy órtten qutqarǵan sarbaz Ǵalymjan Áleýhanov jýyrda Aqordada «Erligi úshin» medalimen marapattaldy. Bul jóninde Elbasy «Beıbit ómirde basyn qaterge tigip, eki balany órtten qutqarǵan Ǵalymjan Áleýhanov eren erlik kórsetti. Onyń bul isi barsha jurtqa úlgi. Sol sebepti «Erligi úshin» medalimen marapattalady», – dedi.
Saparbaı PARMANQUL,
«Egemen Qazaqstan»
ALMATY