10 mamyr, beısenbi kúni oblys ákimi Berdibek Saparbaev 31 basqarýshy kompanııanyń basshylarymen, sonyń ishinde qalany sanıtarlyq tazalýmen aınalysatyn operatorlarmen kezdesti.
Kezdesýdiń basty taqyryby qoqys shyǵarý men oblys ortalyǵyn abattandyrý máseleleri boldy. Qoqys shyǵarý jumystaryn jolǵa qoıý qajettiligi - búginde bul kompanııalar úshin birinshi mindet.
- Búgin jáne erteń ortaq kúsh-jigerimizben qalany tazalaý qajet, birde bir qoqys alańynda qoqys bolmaýy tıis, - dedi oblys basshysy.
Qala ákiminiń mindetin atqarýshy Qýandyq Qasymov kelisimge sáıkes, qala ákimdigi bir aı merzimde merdiger uıymdarǵa mashınalarmen, atap aıtqanda, qoqys tasýshylarmen kómektesedi, al bolashaqta kompanııalar óz jumystaryn tıisti deńgeıde uıymdastyrýy qajettigin habarlady. Aıta keteıik, olarmen jasalǵan kelisim sharttar bes jylǵa jasalǵan.
Oblys ákimi qyzmet kórsetýshi obektilerdiń sany men qoldaǵy bar tehnıkalar týraly surady. Bir kompanııa orta shamamen 500 konteınerlerge qyzmet etetini atap ótildi. «KamAZ» kóligi 1 ret qatynaǵanda shamamen 100-110 konteınerlerdi aparyp tastaı alady.
Olardyń atynan turǵyndar tarapyna da eskertýler aıtyldy, aqtóbelikter qoqys alańyna úlken kólemdi jıhaz jáne tehnıkalyq jabdyqtardy ákeledi, bul qyzmet kórsetýshi kompanııalarǵa birqatar qıyndyqtardy týdyrady. Bul máseleni sheshý jergilikti polısııa qyzmetine júkteldi.
Oblys ákimi merdigerlerdi muqııat tyńdap, memlekettik organdarǵa qoldanystaǵy zańnama aıasynda kompanııalarǵa qoldaý kórsetýge tıisti tapsyrma berdi.
Temir Qusaıyn,
"Egemen Qazaqstan"