Match kezinde fýtbol alańyna júgirip shyqqan jigit «Astana» klýbyna 2 mıllıon teńgege jýyq soma tóleıtin boldy.. Astana qalasynyń Almaty aýdandyq soty osyndaı sheshim shyǵardy, dep habarlaıdy fca.kz.
Sot sheshimi boıynsha Shamsýllo Faızıev esimdi jankúıer «Astana» klýbyna 1 968 150 teńge tóleýi tıis.
Aıta keteıik, 2017 jyly 23 qazanda Eýropa Lıgasy toptyq kezeńiniń aıasynda «Astana Arena» stadıonynda «Astana» men «Vıllıarreal» arasynda matchynda Shamsýllo Faızıev buzaqylyq nıetpen alańǵa júgirip shyǵyp, matchqa kedergi keltirmek bolǵan.
Osy oqıǵa úshin ÝEFA «Astana» fýtbol klýbyna 5 myń eýro kóleminde aıyppul saldy. Al elordanyń fýtbol klýby osy somany óndirip alý úshin Faızıevtiń ústinen talap-aryz berdi.
Is materıaldaryn qaraǵan Astana qalasy Almaty aýdandyq soty Sh.Faızıevten «Astana» klýbyna 1 968 150 teńge óndirý jónindegi sheshim shyǵardy.
«Eger osyndaı oqıǵalar elorda klýbynyń eýropalyq klýbtyq týrnırlerinde jáne Qazaqstan birinshiliginiń oıyndarynda qaıtalansa ÝEFA nemese QFF «Astana» klýbyna atalǵan somadan kóp aıyppul salady. Sondyqtan elordalyq fýtbol klýby sot organdary arqyly buzaqylardan aıyppulǵa ketken shyǵyndaryn tolyq kólemde óndirip alýdy talap etedi», - delingen klýbtyń saıtynda.