Almaty oblysynda apatqa ushyraǵan Iаk-12M ushaǵynyń tekserý jumystary aıaqtaldy, dep habarlaıdy IDM baspasóz qyzmeti.
Áýe apatynyń negizgi sebebi áýe kemesiniń ruqsat etilmeıtin shaǵyn bıiktik pen ushý jyldamdyǵynda áýe kemesiniń manevrlerdi (ruqsat etilgen eń joǵary orammen burylý) oryndaýy bolyp otyr.
Osyndaı manevrler, sondaı-aq ushaqty basqarý kezinde ushý bıiktigi men jyldamdyǵyn baqylaýdy joǵaltýdyń saldarynan ushý bıiktiginiń joǵalýyna jáne áýe kemesiniń jer betimen oń jaǵymen soqtyǵysýyna alyp keldi.
Áýe kemesiniń jer betimen soqtyǵysýy nátıjesinde ushaq qurylymy buzylyp, órt shyqty, sonyń nátıjesinde ushqysh pen jolaýshy (sharýa qojalyǵynyń ókili) qaza boldy.
Budan basqa, avıasııalyq oqıǵany tekserý barysynda kelesideı yqpal etýshi faktorlar men kemshilikter anyqtaldy:
- áýe kemesi komandıriniń ushý aldyndaǵy demalys kezinde alkogoldi asyra paıdalanýy, bul ushýdyń qaýipsiz oryndalýyn jáne aıaqtalýyn qamtamasyz etpedi;
- ushaqty basqarýǵa jolaýshynyń ádeıi emes aralasý múmkindigi (ushaq eki jaqty basqarý elementterimen jabdyqtalǵan);
- áýe kemesi komandıriniń osy áýe kemelerine arnalǵan ruqsat etilgen massadan asatyn massamen ushýy; ushqysh kabınasynda ushý tapsyrmasyn oryndaýǵa baılanysy joq bógde adamnyń bolýy.
«Tekserý qorytyndysy boıynsha, QR IDM Azamattyq avıasııa komıtetine «Kazavıa» JShS avıasııalyq jumystardy oryndaýǵa arnalǵan kýálikterdi qaıtarý jáne ekıpaj músheleriniń ushý aldyndaǵy demalys rejimin saqtaý, sondaı-aq ushý tapsyrmasyna qatysy joq ruqsat etilmegen tulǵalardyń áýe kemesiniń kabınasynda bolýyna jol bermeý bóliginde bazalyq aerodromdardan tys jerge otyrǵyzý alańdarynda ár túrli áýe jumystaryn oryndaıtyn áýe kemeleriniń paıdalanýshylaryna baqylaýdy jáne qadaǵalaýdy kúsheıtý múmkindigin qarastyrý usynyldy», - delingen habarlamada.
Aıta keteıik, 2017 jylǵy 27 shildede Iаk-12M ushaǵy apatqa ushyraǵan bolatyn. Áýe apatynan 54 jastaǵy Halıt Aqberdınov pen 39 jastaǵy sharýa qojalyqtyń basshysy Másimjan Másimov kóz jumǵan. Ushaq komandıriniń 33 jyldyq ótili bolǵan.