...úlgi etedi
Maqsat – salamatty ómir saltyn nasıhattaý
Shetpedegi ortalyq kóshelerde salamatty ómir saltyn nasıhattaý maqsatynda densaýlyq aksııasy ótkizildi. Shara buqaralyq sportty damytyp, el Úkimetiniń 2016 -2019 jyldarǵa arnalǵan «Densaýlyq» memlekettik baǵdarlamasynyń is sharalar josparyn oryndaý aıasynda jáne salamatty ómir saltyn qalyptastyrý ortalyǵynyń tujyrymdamasyna sáıkes ótkizilgen bolatyn.
Jastar aldymen ortalyq bazar men saýda oryndaryna baryp temeki shegip turǵan turǵyndarmen sóılesip, onyń adam aǵzasyna tıgizer zııany týraly túsinik jumystaryn júrgizdi. Odan ári belsendi jastar turǵyndarǵa temekiniń zardaptary jaıynda arnaıy baspadan shyǵarylǵan kitapshalar men únparaqshalar taratyp, turǵyndardyń kókeıkesti saýaldaryna jaýap berdi.
«Osyndaı densaýlyqqa paıdasy mol ıgi ister turǵyndar arasynda jıi ótip tursa jaqsy bolar edi. Sońǵy ýaqytta qyz-kelinshekter arasynda osy temeki tartatyndar sany kóbeıýde. Sondyqtan da aýrý balalardyń sany artyp keledi. Bul ortaq álemdik problemaǵa aınalyp otyr», – deıdi aýdandyq emhananyń narkolog dárigeri Sáýlet Tólemisova.
Allabergen QONARBAEV
Mańǵystaý oblysy,
Mańǵystaý aýdany
...ún qosady
Mektep tarıhyn naqtylaıtyn derek
Gazetimizdiń Pavlodar oblysyndaǵy menshikti tilshisi Farıda Byqaıdyń «Mirjaqyp Dýlatovtyń esimi beriledi» atty shaǵyn maqalasyna oraı («Egemen Qazaqstan» gazeti, 2 sáýir, 2018 jyl) redaksııamyzǵa hat kelip tústi. Maqalada Ýspen aýdanynyń Jelezın aýylyndaǵy №3 qazaq orta mektebine 2011 jyly oblystyq onomastıkalyq komıssııanyń M.Dýlatovtyń esimin berý jónindegi usynysyna bıyl oblystyq máslıhattyń kezekti sessııasynda oblystyq tilderdi damytý basqarmasy oblys ákimdigi men oblystyq máslıhattyń birlesken qaýlysy men sheshimin usynǵany, jobada mektepke M.Dýlatovtyń esimi beriletini, qujattardyń respýblıkalyq onomastıkaǵa jiberilgeni qamtylǵan bolatyn.
Osy jáıt boıynsha hat joldaǵan zeınetker ustaz, qamqorshylar keńesiniń tóraıymy N.Aldybaeva mektepke M.Dýlatovtyń esimin berý máselesin 2009 jyly 11 jeltoqsanda ata-analar komıtetiniń tóraǵasy Marat Hasanuly Bagjıkov kótergenin, osyǵan oraı quzyrly mekemelerge ótinish hattar jazylǵanyn, barlyq jumys atalǵan azamattyń basshylyǵymen júrgizilgenin aıta kele, M.Bagjıkovtiń «Týǵan ólke» gazetiniń №46 sanynda (14 qarasha, 2009 jyl) Jelezın aýylynda tuńǵysh qazaq mektebi iske qosylarda 100-den astam aýyldastarynyń qolynyń qoıylýymen aýdan ákimine ótinishpen kirgeni jáne Alash qaıratkeriniń ómiri jaıly jazǵan «Alashtyń ardaqty azamaty» atty maqalasyn joldapty.
Materıaldaǵy mektep tarıhyna qatysty derekterdi tolyqtyrýǵa ún qosqan hat ıesine redaksııa tarapynan rızashylyǵymyzdy bildiremiz.
«Egemen-aqparat»
...maqtan tutady
Ardager atyna kóshe berildi
Qyzylorda oblysy, Shıeli aýdanynyń Kókshoqy shaǵyn aýdanynda Uly Otan soǵysy jáne eńbek ardageri Baıtiles Júsipovtiń atyna kóshe berildi. Aýdan ákimi Uly Otan soǵysynyń ardageri Baıtiles Júsipovtiń el qorǵaýdaǵy azamattyq paryzy men beıbit ómirde eleýli eńbek etkendigin alǵa tartty. Otan qorǵaý barysynda birneshe qalalardy azat etýge qatysyp, orden, medaldarmen marapattalǵan Baıtiles aqsaqal elge kelgen soń da jamaǵatyna úlgi kórsetken kisi. Únemi ónege bıiginen kóringen áýlet urpaqtary bul kúnderi túrli salada el damýyna ózindik úles qosyp keledi. Olardy shıelilikter ónege tutady. Erlik pen eldikti dáripteý búgingi óskeleń urpaqtyń aldynda turǵan mindeti bolsa, aýdan ákimdiginiń uıymdastyrýymen ótkizilgen shara sonyń dáleli. Kósheniń ashylý saltanatynda Baıtiles aqsaqaldyń kózin kórgen ókshelesteri estelikter aıtsa, aǵaıyndary jaqsynyń artynda iz qalaryn maqtan tutty.
Nurmahan ELTAI
Qyzylorda oblysy,
Shıeli aýdany
...renishin bildiredi
Toıdan júdep qaıttym...
«Toı dese qý bas domalaıdy» demekshi, bir demalysta tanysymnyń balasynyń úılený toıyna bardym. Bir qyzyǵy, toı betasharsyz, jar-jarsyz ótti. Kelinniń bet-aýzy tumshalanǵan, kúıeý jigittiń beti saqal-murttan kórinbeıdi. Uıpa-tuıpa, kıimi olpy-solpy, týra bir uıqydan tura salyp, júgirip kelgendeı áser qaldyrdy...
Qazaqtyń toıy degenimiz – dombyramen kúıi kúmbirlegen, bıi bılengen, shashýy shashylǵan, án-jyry shyrqalǵan, aqsaqaldyń batasy aıtylǵan qýanyshty sán-saltanat emes pe?! Nesin aıtasyz, jastardyń ómirinde bir ret bolatyn úılený toıynda sán-saltanatsyz, toıdyń basynan aıaǵyna deıin «ustazdardyń» ýaǵyzyn tyńdap qaıttyq. Toıdyń araq-sharapsyz ótkenine esh qarsylyǵym joq. Ol jaǵy durys endi. Biraq betasharsyz, jar-jarsyz qazaqtyń toıy bolýshy ma edi?..
Qaınar TÁLIPULY
Aqtóbe oblysy
...alǵys aıtady
Shıpager shapaǵaty
Men Bazarbaı Allambergenov osydan biraz buryn densaýlyqtan qınalyp Astanadaǵy respýblıkalyq dıagnostıkalyq ortalyqqa baryp qaralyp edim, ondaǵy qorytyndy boıynsha júrek qantamyrym bitelip qalǵan delinip qorytyndy shyǵarylyp, birden kardıologııalyq ortalyqqa operasııaǵa joldama berdi. Sondaǵy kúızelisimdi áli kúnge umyta almaımyn.
Sodan operasııaǵa deıin ne de bolsa dep Aqtóbede turatyn halyq emshisi Janarys Eńsepovtiń aldynan ótýdi jón kórdim.
Halyq emshisiniń duǵa-emi kóp jurtty aýrýynan aıyqtyrǵanyn estýim bar bolatyn. Ne kerek, emshi aýrýymdy tyńdap baryp, óziniń em-domyn jasap: «Endi ana dıagnostıkalyq ortalyqqa baryp qaıta tekserýden ótip kórińiz» dep duǵa-batasyn berip shyǵaryp saldy.
Sóıtip úmitimdi úzbeı emshiniń aıtýy boıynsha ortalyqtan qaıta tekserýden ótip edim – táleıim bar eken, ótkendegi qorytyndy izim-qaıym bolyp, mine búginge deıin din aman júrmin... Din aman demekshi, emshige qaıta jolym túsip, ishimdegi zaqymdanǵan jerlerim de jazylyp, tynys alýdaǵy kidiris ataýlydan da qulantaza jazylyp kettim. Shıpager Janarys Jaqsylyqulynyń shıpasy bútkil otbasymyzǵa daryp, qozǵalýdan qalǵan áıelimniń aıaqtaryna jan bitip, eń aıaǵy kelinimniń náreste kóterýine de sebi bolyp – Alla jar boldy emes pe. Ol kisi týraly aqyn Shómishbaı Sarıev jazǵan «Qydyr Ata Janarys Jaqsylyquly» atty kitapty oqyp táýbama keldim. Aıtarym – bir men emes, dúıim jurtqa emi daryp, batasyn alyp júrgen halyq emshisiniń rahymy bir Alladan qaıtsyn.
Bazarbaı ALLAMBERGENOV,
Orynbek ShARIPOV,
eńbek ardagerleri
ASTANA