Elbasy «Nur Otan» partııasy Saıası keńesiniń ótken jyldyń qarasha aıyndaǵy keńeıtilgen otyrysynda partııa qyzmetin jańǵyrtýǵa qatysty naqty tapsyrmalar bergen-di. Osyǵan oraı partııa sıfrlandyrýdy júzege asyrý, shaǵyn jáne orta bıznesti qoldaý jáne «Rýhanı jańǵyrý» baǵdarlamasyna úles qosýǵa baǵyttalǵan tyń bastamalarǵa qatysty jobalardy qolǵa alǵan.
Partııa Tóraǵasynyń birinshi orynbasary Máýlen Áshimbaev Aqmola oblysyna sapary barysynda osy jobalardyń júzege asyrylý barysymen tanysty. Aldymen ol Kókshetaý qalasy ortalyǵynda ornalasqan M.Ǵabdýllın atyndaǵy №3 mektep-gımnazııasynda bolyp, IT-synyptyń qazirgi jaǵdaıyn kórip bildi. Atalǵan bilim shańyraǵyna Máýlen Áshimbaev Aqmola oblysynyń ákimi Málik Myrzalınmen birge keldi. Aıta ketý kerek, bul oqý ordasynda partııanyń balalarǵa baǵdarlamalaý negizderin oqytatyn tegin IT-synyptar ashý jobasy boıynsha arnaıy synyp jumys isteıdi. Oqýshylar bul kúnde «Pascal», Java», «PhP», «Delph» sııaqty baǵdarlamalaý tetigin ıgerip, robot-tehnıkasyna qatysty bilimderin tereńdetýge múmkindik alyp otyr. Bul úshin mektep qabyrǵasynda barlyq jaǵdaı jasalǵan. Partııa bastamasymen elimizde myńǵa tarta IT-synyp ashylyp, onda jylyna 150 myń bala baǵdarlamalaý jáne robot-tehnıkasyn ıgerý mashyqtary boıynsha tereńdetilgen bilim alatyn bolady.
Budan basqa, ótken jyly mektep bazasynda «Baǵdarlamalaý» úıirmesi ashylǵany belgili. Onda jetkinshekter IT tehnologııa, 3D modeldeý sııaqty jańa ınnovasııalyq baǵytta bilimderin tolyqtyra aldy. Sonyń arqasynda mektep túrli ınnovasııalyq jobalar baıqaýynda top jaryp, oqýshylar joǵary jetistikterge qol jetkizip keledi. Aıta ketý kerek, 9, 11-synyp oqýshylarynyń memlekettik emtıhanǵa jáne ulttyq biryńǵaı testileýge daıyndalýyna arnalǵan veb-saıtty osy mektep-gımnazııanyń jas ónertapqyshtary oılap tapqan. Mine, osyndaı aýqymdy jumystardyń tabysty júzege asyrylýy «Sıfrly Qazaqstan» memlekettik baǵdarlamasynyń jemisi ekeni sózsiz.
Sondaı-aq partııa Tóraǵasynyń birinshi orynbasary A.Myrzahmetov atyndaǵy Kókshetaý ýnıversıtetindegi IT-ortalyqtyń jumysymen jan-jaqty tanysty. Bul ortalyq partııanyń IT-mamandar daıarlaý jobasy aıasynda ashylǵan. Endi bul jerde ýaqytsha jumyssyz júrgen jáne ózin ózi jumyspen qamtyǵandar baǵdarlamalaý negizderi boıynsha bilim alyp keledi. Olar «Java», «PhP», «Delphi», «C++3D», «Max3D», «Studio», «MaxFoxPro», «Corell3» sııaqty baǵdarlamalarmen tanysyp ǵana qoımaı, solardy paıdalaný arqyly jumys isteýge mashyqtanady. Jalpy, IT-kompanııalar men iri joǵary oqý oryndary bazasynda osyndaı 20 IT-ortalyq ashylyp, olarda jylyna 35 myń adam bilim alady dep josparlanyp otyr. El turǵyndarynyń sıfrly saýattylyǵyn arttyrý baǵytynda qazirgi tańda kóptegen jumystar atqyrylýda. Ásirese jastardy básekege qabiletti maman retinde qalyptastyrý erekshe nazarda. Sondyqtan da aldaǵy ýaqytta jastardyń qabiletterin shyńdaý maqsatynda partııa aıtarlyqtaı kúsh salatyn bolady.
Sapar barysynda M.Áshimbaev óńirdegi bıznes qaýymdastyq ókilderimen kezdesip, osy saladaǵy partııalyq jobalar jaıyn keńinen talqylady. «Nur Otan» partııasy shaǵyn jáne orta bıznesti qoldaý maqsatynda kásipkerlerge arnalǵan Biryńǵaı geoaqparattyq onlaın qyzmet usynatyn portal qurýdy qolǵa alyp, onda bıznes salasyndaǵy memlekettik qyzmetterdi elektrondy formatqa kóshirý, damyǵan elderdiń eń úzdik úlgilerin engizý jáne bıznes shyǵyndaryn azaıtý kózdelgen. Sonymen qatar budan bylaı kásipkerlerdiń kommersııalyq maqsattaǵy jer telimderine qatysty tolyq málimet alýyna, bıznes júrgizýdiń biryńǵaı standarttaryn engizý jaıynan habardar bolýyna múmkindik jasalady. «Atameken» ulttyq kásipkerler palatasynyń oblystyq fılıalynda ótken basqosýda óńirdiń bas jospary engizilgen ınteraktıvti karta daıarlaý bastamasy talqylandy. Osy karta arqyly aqmolalyq kásipkerler ınjenerlik ınfraqurylymǵa qol jetkizip, bos jer telimderi týraly tolyq málimetter ala alady.
M.Jumabaev atyndaǵy Aqmola oblystyq ámbebap ǵylymı kitaphanasyna at basyn burǵan partııa Tóraǵasynyń birinshi orynbasary qazirgi tańda elimizdegi kitaphanalardyń zamanaýı bilim ortalyqtary retinde qaıta qurý jumystary bastalǵanyna toqtaldy. «Rýhanı jańǵyrý» baǵdarlamasy aıasynda elimizdegi kitaphanalardy zamanaýı bilim ortalyqtary retinde qaıta qurý bastamasy partııa jobalarynyń qatarynda.
«Partııa Tóraǵasynyń tapsyrmasyna sáıkes «Nur Otan» partııasy da óz qyzmetin jańǵyrtý boıynsha naqty jumystardy qolǵa aldy. Aqmola oblysyndaǵy ıgi bastamalar sonyń jemisi. Aldaǵy ýaqytta da partııa qazaqstandyqtardyń zaman talaptaryna beıimdelgen, ınnovasııalyq jetistikterdi erkin meńgergen, IT salasynda básekege qabilettiligin arttyrý úshin bastaǵan jumystaryn laıyqty jalǵastyrady», dedi M.Áshimbaev partııalyq jobalardyń mańyzdylyǵy týraly aıta kelip. Sapar sońynda partııa Tóraǵasynyń birinshi orynbasary «Nur Otan» partııasy oblystyq aktıvimen kezdesip, partııalyq jobalardy júzege asyrýdyń tıimdi tetikterin jan-jaqty talqylady.
Asqar TURAPBAIULY,
«Egemen Qazaqstan»
Aqmola oblysy