Almatyda halyqaralyq dástúrli medısına jáne halyq emshileriniń III sezi ótti. Úsh kúnge sozylǵan alqaly basqosýǵa otandyq halyq emshilerimen qatar 17 memleketten – Qytaı, Mońǵolııa, Reseı, Japonııa, Ýkraına, Túrkııa, t.b. elderden kelgen qonaqtar qatysty.
– Memleket basshysy N.Nazarbaev qashanda ulttyń densaýlyǵy máselesine orasan kóńil bóledi, – dedi sezdi ashqan Densaýlyq saqtaý mınıstrligi janyndaǵy «QR halyqtyq jáne rýhanı emshiler» mekemesiniń dırektory, ShYU sheńberinde Dástúrli medısına akademııasyn qurý jónindegi ShYU-ǵa múshe memleketterdiń resmı ókili Sháken qajy Shyntaev. – Sezd kúnderi bizder bir-birimiz arqyly halyqtyq emniń jańa mektebimen tanysyp, tájirıbe, ádis-tásilderimizben bólistik. Al munyń barlyǵy bizdiń otandastarymyzdyń densaýlyǵy úshin qyzmet jasaıtyn bolady.
Bir aıta keterligi, búginde halyqtyq em qanatyn keń jaıa túsýde. Oǵan Shańhaı yntymaqtastyǵy uıymy sheńberinde Dástúrli medısına akademııasyn qurý jóninde qanatqaqty joba usynyp, sonyń negizinde uıymǵa múshe memleketter memorandýmǵa qol qoıýy dálel bolsa kerek. Onyń shtab-páteri Pekın men Máskeýde ornalasqan. Baǵdarlamanyń maqsaty – kadr daıyndap, olardyń bilimin jetildirý, dástúrli medısınamen halyqty emdeýdi joǵary ǵylymı turǵyda negizdeý. Qazir Qazaqstanda osy akademııa qurylyp, óz jumysyn bastap ketti. Elimizde ótken bul jıyn osy máseleniń oń sheshilýine yqpalyn tıgizbek.
Forýmda sóılegen sheshender dástúrli halyqtyq medısına men emshilikti uıymdastyrýdaǵy jumystardy, praktıkalyq qyzmetterin saraptan ótkizip, kelesi jyly Túrkııada ótetin halyqaralyq sımpozıýmda qaralatyn máselelerge qatysty usynystaryn pysyqtady.
Gúlzeınep SÁDIRQYZY.