Qaraǵandy qalasynyń irgesindegi Spassk áskerı polıgonynda «Rýhanı jańǵyrý» baǵdarlamasy sheńberinde urpaqqa úlgi bolar tarıhı negizdi shara ótti. Uly Jeńis merekesi men Kýrsk ıinindegi áıgili shaıqastyń 75 jyldyǵy qarsańynda uıymdastyrylǵan «Tarıhta qalǵan batyrlar» atty áskerı kvest Keńes Odaǵynyń Batyry Amantaı Dáýletbekovtiń erligine arnaldy.
Amantaı Dáýletbekov 1917 jyly Qaraǵandy oblysynyń Jańaarqa aýdanynda týǵan. 1943 jyly Ponyrı qalashyǵy mańynda bolǵan qııan-keski urysta ishinde jańaarqalyq jaýynger de bar shaǵyn ásker jaý qorshaýynda qalady. Bar kúshimen lap qoıǵan jaýǵa aqtyq demine deıin qarsy turyp, tabandylyq tanytqan erler óńmeńdegen basqynshylardyń betin qaıtardy. Erlikpen qaza tapqan Amantaı Dáýletbekovke Keńes Odaǵynyń Batyry ataǵy beriledi.
«Dala sahnasyndaǵy» kórinisti soǵys ýaqytyndaǵydaı áserli etý úshin «Astana» óńirlik qolbasshylyǵy sharaǵa qatysýshylardy polıgonmen qatar, áskerı tehnıkamen, artıllerııalyq qarýlarmen, dala ashanasymen, medısınalyq palatkalarmen qamtamasyz etti. Al jaý áskerleriniń rólin oınaý úshin «Ortalyq» óńirlik qolbasshylyǵynyń áskerıleri arnaıy keldi.
Sharaǵa daıyndyq jumystary joǵary deńgeıde júrgeni baıqalady. Eki jaqtyń áskerlerine, sanıtarlarǵa tigilgen arnaıy kıim úlgilerin aıtpaǵanda, ár taraptyń ózine saı qarý-jaraqtardyń maketine deıin kórer kózge shyndaı etip jasalǵan.
Áskerı-tarıhı kvestke eki júzden astam adam qatysty. Olardyń deni negizinen kolledj stýdentteri, sportshylar jáne basqa da erikti qatysýshylar. Olardy tasymaldaý úshin arnaıy avtobýstar da bólingen. Sharany Qaraǵandy qalasynyń ákimdigi men máslıhatynyń, «Nur Otan» partııasy qalalyq fılıalynyń qoldaýymen, qalalyq mádenıet jáne tilderdi damytý bólimi jáne Jańa Maıqudyq mádenıet úıi uıymdastyrdy.
Daladaǵy kórinis ony kórgen jandardy, ásirese qurmetti qonaq retinde shaqyrylǵan soǵys ardagerlerin aıtarlyqtaı áserge bóledi. Áreketterdiń shynaıylyǵynan bolar, úlkender jaǵy kózine jas aldy. Uly Otan soǵysynyń ardageri Grıgorıı Stepenko aıtqandaı, jas urpaq babalarynyń erlik isterin esten shyǵarmaýy úshin osyndaı sharalardy jıirek uıymdastyryp otyrǵan abzal.
Osy sharaǵa Amantaı Dáýletbekovtiń shóberesi Rahman Ábishev arnaıy shaqyrylǵan bolatyn. «Adamzat úshin qasiretti shaqtar qaıtalanbaýy tıis, – deıdi batyrdyń urpaǵy. – Elbasy N. Nazarbaevtyń ustanyp otyrǵan beıbit saıasatynyń arqasynda qazir aspanymyz ashyq, kúnimiz shýaqty. Júzden astam ulttar bir shańyraqtyń astynda tatý-tátti tirlik keship jatyrmyz, osy mamyrajaı ómirimiz máńgilik dep senemin».
Qaırat ÁBILDA,
«Egemen Qazaqstan»
QARAǴANDY