Qazaqstan premer-lıgasynyń H týr oıyndary ótti. Chempıondyqtan dámesi zor «Qaırat» syrt alańda jeńilip qalyp, «Astanaǵa» taǵy bir múmkindik berip qoıdy. Al «Aqtóbe» – «Aqjaıyq» oıynynda 8 birdeı gol soǵyldy.
«Qyzyljar» men «Qaısardyń» kezdesýimen bastalǵan týr tartysty oıyndarǵa toly boldy. О́z alańynda tegeýrindi komandaǵa aınala qalatyn «Qyzyljar» «Qaısar» qaqpasyna á degennen lap qoıdy. Alaıda sońǵy 2 oıyndy 3:0 esebimen utqan qyzylordalyqtar qorǵanysqa bekem boldy. Qos komanda birin-biri ala almaı teń tarqasty. Aıta keteıik, oıyn sońynda «Qaısar» qorǵaýshysy Djon Kamara qyzyl qaǵaz alyp alańnan qýyldy. Endi ol kelesi oıynǵa qatysa almaıdy.
«Astanany» utyp bir jelpingen Qaraǵandynyń «Shahteri» qara jolaqqa túsip qalǵandaı. Sońǵy 2 oıynda da jeńildi. Alǵashqysyn túsinýge bolar, al sońǵy oıynda óz alańynda «Ertiske» jeńilgeni jankúıerlerdiń shymbaıyna batty. «Kenshiler» kelesi oıynda 3 upaı almasa, bas bapker Vladımır Jýraveldiń de qyzmetten ketýi ǵajap emes. Alaıda «Shahter» kelesi oıyndy Almatyda «Qaıratqa» qarsy ótkizedi. «Ertistiń» ázirge joly bolyp tur. Tóreshi qosqan 3 mınýttyń sońǵysynda qaraǵandylyq Pıkalkın óz qaqpasyna gol soǵyp aldy.
Sońǵy mınýt sındromyn bul týrda «Qaırat» ta bastan ótkerdi. Match boıy dopqa kóbirek ıe bolyp, qarsylastyń adymyn ashtyrmaǵan almatylyqtar 88-mınýtta gol jiberip aldy. «Qaırat» qarsylasty qyspaqqa alyp, jeńisti goldy ańsap júrgen shaqta qarymta shabýylǵa shyqqan qostanaılyqtar úsh paspen almatylyqtardyń aıyp alańyna jetip úlgerdi. Tájirıbeli Tańat Nóserbaev ádemi pastan soń bos qaqpaǵa dopty toǵyta saldy.
Chempıonat lıderi «Astana» syrt alańda «Atyraýdy» utty. Birinshi taımda gol múlde soǵylmasa, ekinshi taımnyń bel ortasynda elordalyqtar 2 dop soqty. Patrık Tvýması penaltıden esep ashyp, araǵa 3 mınýt salyp Marın Tomasov ony eseleı tústi.
Alǵashqy 4 oıynda 4 qana gol soǵylyp, týrdyń qyzyǵy bolmady dep otyrǵanymyzda «Aqtóbe» oıynshylary naǵyz shoý jasady. Kezdesýdiń 27-mınýtynda Baǵdat Qaıyrov esep ashyp, alań ıelerin alǵa shyǵardy. Odan keıin Markos Pızellı ekinshi goldy salyp, «Aqjaıyqty» eseńgiretip tastady. Ol az bolǵandaı, birinshi taımnyń sońǵy mınýtynda Reınaldo úshinshi goldy soǵyp, «Aqjaıyqty» jerge qaratty. Ekinshi taımdaǵy Reınaldo men Pızallı taǵy bir-birden kózge túsip edi «Aqjaıyqtyń» salysy sýǵa ketti. Qonaqtar tek 73-mınýttan bastap esterin jıdy. Oraldyqtar 80-mınýtqa deıin úsh gol soǵyp, esep aıyrmasyn qysqartty. «Aqtóbeniń» jeńisinen keıin týrnırlik kestedegi sońǵy orynǵa «Atyraý» túsip qaldy.
Ermuhamed MÁÝLEN, «Egemen Qazaqstan»