Áýezov teatrynyń Aqjaıyqtaǵy kúnderi

Áýezov teatrynyń jyl sa­ıynǵy dástúrli jazǵy gastroli bıyl Batys Qazaqstan oblysynan bastaldy. Ǵasyrǵa jýyq tarıhy bar teatrdyń D.Temirsultanova, D.Aqmolda, A.Satybaldy se­kildi tanymal ónerpazdary I.Saparbaıdyń «Syǵan serenadasy», M.Oma­rovanyń «Aqtas­taǵy Ahıko», R.Otarbaevtyń «Beıbarys sultan», Ǵ.Esimniń «Tańsulý», A.Volodınniń (aýdar­ǵan A.Mae­mırov) «Qoshtasqym kel­meıdi...» qoıylymdaryn sahnalady.

Bir ereksheligi, bul joly Áýezov teatry ózderiniń mý­zeı qorynan qyzyqty jádi­gerler ákelip, kóshpeli kórme de uıymdastyrdy. Jarty ǵa­syr­lyq tarıhy bar teatr mýzeıinde al­ǵash­qy tea­tr ártisteriniń kıim­deri men fo­­tosýretteri, afı­shalary, baǵ­darlamalary, ómir­den ozǵan teatr ártisteriniń ómir­baıandary, jeke materıaldary, qoljazbalary, alǵan syı­­lyqtary saqtalǵan. Teatr mý­zeıiniń jetekshisi Nargız Asanjanova oraldyqtarǵa árbir jádigerdiń tarıhyn áserli áńgi­melep berdi.

– «Rýhanı jańǵyrý» baǵ­dar­lamasy aıasynda teatr gas­troli óńirlerde budan bylaı da jal­ǵasady. Buǵan qosa biz bıyl Fran­sııada ótetin dúnıejúzilik «Avenıý» teatr festıvaline Qazaq­stannan tuńǵysh ret qaty­saıyn dep otyrmyz. Biz bul dodaǵa aqyn-dramatýrg, Mem­lekettik syı­lyqtyń laýreaty Iran-Ǵa­ıyptyń (Iranbek Oraz­­baev) «Qor­qyt» dramasyn ázir­lep ja­tyrmyz, – deıdi óner ujy­my­nyń bolashaq josparlarymen bólisken teatr dırektory, Qazaqstannyń eńbek sińirgen qaıratkeri Ashat Maemırov.

Ákemteatrdyń gastroldik sapary jeksenbi kúni R.Otar­baevtyń «Beıbarys sul­tan» tarıh drama qoıylymymen aıaqtaldy. Beıbarys sul­tannyń beınesin akter Aza­mat Sa­tybaldy oınady. Qo­rytyndy keshke Qazaq­stannyń Eńbek Eri, KSRO ha­lyq ártisi, KSRO, QazKSR Mem­le­kettik syı­lyqtarynyń laýreaty Asan­áli Áshimov, Halyq ár­tisi Es­muqan Obaev qatysyp, tilek bildirdi. Teatr dırektory Ashat Maemırov ár qoıylymdy qu­shaq jaıa qarsy alǵan kórermen qaýym­ǵa, teatr ártisterin arnaıy qa­byl­dap, qurmet kór­setken oblys basshylaryna al­ǵysyn aıtty.

Áýezov teatrynyń gastroli Qostanaı oblysynda, Arqalyq qalasynda jalǵaspaq.

Qazbek QUTTYMURATULY, «Egemen Qazaqstan»

ORAL