Sh.Aımanov atyndaǵy «Qazaqfılmge» qarasty «Debıýt» shyǵarmashylyq-óndiristik birlestiginde túsirilgen «Hat» fılmi mamyr aıynyń 3 men 8-i aralyǵynda Germanııada ótken 64-halyqaralyq «Oberhaýzen» qysqametrajdy fılmder kınofestıvaliniń (Internationale Kurzfilmtage Oberhausen) negizgi konkýrstyq baǵdarlamasyna iriktelip alyndy.
Jas rejısser Ádil Musataev túsirgen debıýttik kartına ishteı jan arpalysyna túsip, anasyna hat jazýdy armandap, tolǵanysta júrgen balalar úıiniń tárbıelenýshisi týraly baıandaıdy.
– Fılm oqıǵasy shynaıy ómirden alynǵan. Bul oqıǵa О́skemen qalasyndaǵy balalar úıinde bolǵan eken. Osy oqıǵany tanysymnan estı sala, daıyn dramatýrgııanyń bar ekenin ańǵaryp, ony kıno tilimen sóıletýge asyqtym. Jas rejısserlerge qanat bitiretin osyndaı bedeldi kınofestıvalde alǵashqy fılmimniń tusaýy kesilgenine óte qýanyshtymyn,– deıdi rejısser Ádil Musataev.
«Oberhaýzen» kınofestıvaliniń resmı saıtynyń málimeti boıynsha, bıylǵy halyqaralyq festıvaldyń negizgi baıqaýyna 33 elden 53 qysqametrajdy fılmniń qatysqany belgili boldy. Olardyń arasynda AQSh, Qytaı, Mysyr, Argentına, Brazılııa, Úndistan, Fransııa, Japonııa, Reseı, Qazaqstan, Fınlıandııa jáne taǵy da basqa elderdiń rejısserleri túsirgen fılmder bar. Jalpy bıylǵy baıqaýǵa 6000-ǵa jýyq fılmnen tapsyrys túsken.
Alpys jyldyq tarıhy bar «Oberhaýzen» halyqaralyq qysqametrajdy fılmder kınofestıvali álemdegi qysqametrajdy fılmderge arnalǵan eń iri baıqaýlardyń biri. Ol 1954 jyldan beri ótkizilip keledi.
Aıgúl AHANBAIQYZY, «Egemen Qazaqstan»
ALMATY