Qostanaı aýdanyndaǵy «Sadchıkov» sút óndirý kesheni endi «aqyldy sút fermasyna» aınalatyn boldy.
Osynda «KAS Konsaltıng» kompanııasy men Qostanaı oblystyq aýyl sharýashylyǵy basqarmasy birlesip, «Aqyldy sút fermasy» aptalyǵyn ótkizýde. Bul Avstrııadan kelgen magıstr Frans Sehner bastaǵan mamandar álemdik tájirıbeni «Sadchıkov» sharýashylyǵyne engizedi. Dúnıe júzinde áli balamasy joq ozyq tehnologııa álemniń kóptegen elderinde qoldanysqa engizilgen. «Sadchıkov» sút fermasynda osy ozyq tehnologııamen 32 sıyr baqylaýǵa alynady. Eger tájirıbe kórsetkishterdi jaqsartsa, qolda ustalatyn golshtın sútti sıyrlar tabynyna túgel osy tehnologııa engiziletin bolady.
Avstrııalyq maman Frans Sehner jýrnalısterge ozyq tehnologııanyń mánin aıtyp túsindirdi. Smaxtec júıesi zamanaýı sút sharýashylyǵyndaǵy tıimdilik pen tabysty arttyrady. Ol úshin Smaxtec júıesiniń bolas dep atalatyn qurylǵysyn sıyrǵa jutqyzý arqyly asqazanynda ustaıdy. Ol sıyrdyń aǵzasyndaǵy ózgerister týraly barlyq aqparatty kompıýter arqyly berip turady. Asqazandaǵy qurylǵy bergen aqparattar arqyly asqazandaǵy silti men qyshqyldyń normasy anyqtalyp, soǵan oraı sıyrdyń jem-shóbi, azyǵy ózgertiledi. Sıyrǵa sýdy kóp berý jaǵy qarastyrylady. Mamandardyń aıtýynsha, sıyrdyń aǵzasy jaqsarady, súti kóbeıedi jáne uryqtandyrylýy ýaqytyly júrip, jylyna buzaý alyp otyrý jaqsarady.
«Golshtın sıyry sútti mol beretin tuqym. Biraq munyń da kóptegen problemalary bar. Sút saýý sharýashylyǵyn sıfrlandyrýdyń eń bir tıimdi túri bolatyn Smaxtec júıesi kemshiilkterdi anyq kórsetedi, oǵan qarsy jumys isteýge ıtermeleıdi. Sonymen qatar sútiń kólemin kóbeıtedi. Mysaly bizdiń sıyrlar jylyna 6 myń lıtr sút berse, osy sıfrlandyrý júıesi iske qosylǵanda olar on myń lıtrden asyryp sút beretin bolady» dedi «Sadchıkov» sút sharýashylyǵynyń dırektory Sergeı Fesner.
Sıyrdyń asqazanyndaǵy bolas bes jylǵa eseptelgen. Osy sıfrlandyrý tehnologııasyna jumsalǵan shyǵyn alty aıdyń ishinde óteledi.
Názıra JÁRIMBET, «Egemen Qazaqstan»