Atyraý oblysynyń ákimi Nurlan Noǵaev «Atyraý» ÁKK dırektorlar Keńesiniń jınalysyna qatysyp, aımaqta júzege asyp jatqan ınvestısııalyq jobalarǵa baqylaýdy kúsheıtýdi tapsyrdy, dep habarlaıdy Atyraý oblystyq óńirlik kommýnıkasııalar qyzmeti.
Aımaq basshysy Nurlan Noǵaev «Atyraý» ÁKK UK» AQ basshylyq quramymen jumys májilisin ótkizdi. Kezdesý barysynda oblys ákimine áleýmettik-kásipkerlik korporasııasynyń jumysy tanystyrylyp, ınvestısııalyq jobalardy júzege asyrý jospary aıtyldy.
Korporasııa qurylǵan 2010 jyldan beri mekeme kirisi 6,7 mlrd teńgege jetken. «Atyraý» ÁKK UK» AQ basshysy Marat Túsipqalıevtiń aıtýynsha, 8 jylda 20 iri joba júzege asqan.
-Olar taýarly sút fermasy, jón óńdeý zaýyty, kókónis óńdeý sehy, qoıma jaılary, basqa da óndiristik ortalyqtar syndy iri mekemeler. Biraq keıbir kásipkerler korporasııadan berilgen qarajatty qaıtarýǵa asyqpaı otyr, - dedi Marat Túsipqalıev. –Munyń ár túrli sebepteri bar. Biz kásipkerge bıznesin damytýǵa qajet qolaıly jaǵdaı jasaýǵa tyrysyp keldik, alaıda keıbir qaryz alýshylardyń jaýapkershilikke yqylassyz qaraýy nátıjesinde bıýdjet qarajatynyń ýaqytyly qaıtarylmaý derekteri tirkelip otyr. Bul óz kezeginde bizdiń quzyrly organdarǵa júginýimizge, qaryz alýshyǵa qatysty shara qoldanýymyzǵa májbúr etýde.
Nurlan Noǵaev dırektorlar Keńesine ınvestısııalyq portfelge baqylaýdy kúsheıtip, qarjylandyrylǵan sýbektilerdiń qyzmetine belsendi qatysýdy tapsyrdy.
- Bizdiń mindetimiz qur aqsha bólip otyrý emes, qarajattyń maqsatty jumsalýyn qadaǵalaý, - dep atap ótti ákim. –Sonymen qatar, kásipkerge negizgi máseleler boıynsha kómek kórsetilip, keńes berý kerek. Bul iske jergilikti atqarýshy organdardyń ókilderi – barlyq deńgeıdegi ákimder, oblys ákiminiń orynbasarlary, basqarma basshylary men bólim jetekshileri jumylýlary kerek. ÁKK ınvestısııalaıtyn jobalar aımaq úshin óte qajet – jumys oryndary qurylady, oblystyń aýyl sharýashylyǵynan bastap qurylysqa deıingi ár túrli salalarynyń damýyna oń yqpal etedi. Qaryz qarajatynyń qaıtarylýyna baqylaý da únemi nazarda bolýy tıis. Mundaı operasııalar kezinde memlekettiń mindeti – bıznestiń damýyna ınvestısııa arqyly serpin berý, qarajat qaıtarylǵannan keıin ony oblysqa qajet basqa mekemege salý kerek.
Aıta keteıik, qazir «Atyraý» ÁKK aımaqtyń áleýmettik salasynda 17 ınvestısııalyq jobany júzege asyrýda.