Búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda ulttyq ekonomıka mınıstri T. Súleımenov, qarjy mınıstri B. Sultanov, ınvestısııalar jáne damý mınıstri J. Qasymbek, energetıka mınıstri Q. Bozymbaev, sondaı-aq, Ulttyq bank tóraǵasynyń birinshi orynbasary O. Smolıakov 2018 jylǵy 4 aıdaǵy áleýmettik-ekonomıkalyq damý men respýblıkalyq bıýdjettiń atqarylý qorytyndysy týraly baıandady.
Tımýr Súleımenovtyń aıtýynsha, Qazaqstandaǵy ekonomıkalyq belsendilik oń qarqyn kórsetýde.
Jalpy alǵanda, ekonomıkadaǵy ósim ınflıasııalyq qysymnyń tómendeýine jáne joǵary ınvestısııalyq belsendilikke negizdelgen. Inflıasııa jyl basynan beri 2,2% qurady. 2017 jyldyń osyndaı kezeńimen salystyrǵanda 0,5 p.p. tómen. Jyldyq ınflıasııa 6,5% deńgeıinde tirkeldi. Inflıasııany jańa dálizde (5-7%) ustap turý qamtamasyz etilýde.
«Eńbek naryǵynda turaqtylyq saqtalýda. Jyl basynan beri 134,8 myń adam jumysqa ornalastyryldy. Osy jyldyń basynan beri naqty eńbekaqynyń ósýi baıqalady. Ol 1,2% qurady. Qańtar–sáýir aılarynda ortasha aılyq eńbekaqy 152,3 myń teńgeni qurady», — dep túıindedi T. Súleımenov.
Ulttyq bank tóraǵasynyń birinshi orynbasary O. Smolıakovtyń aıtýynsha, Ulttyq banktiń altyn–valıýta saqtyq qorlary ótken jyldyń osyndaı kezeńimen salystyrǵanda ($30,6 mlrd deıin) 3%-ke ósti. Sonymen birge, Ulttyq qordyń aktıvteri osy kezeńde 5,6%-ke ($59,3 mlrd deıin) tómendedi.
2018 jyldyń qańtar–naýryz aılaryndaǵy syrtqy saýda aınalymy $21 mlrd qurady jáne 2017 jyldyń tıisti kezeńimen salystyrǵanda 24,3%-ke ósti, sonyń ishinde eksport — $13,8 mlrd (27% ósim), ımport — $7,2 mlrd (19,4%-ke artyq) ósti.
Qarjy mınıstri B. Sultanov óz baıandamasynda memlekettik bıýdjettiń kiristeri (transfertterdi esepke almaǵanda) eseptilik kezeńde 105,1%-ke, olardyń ishinde respýblıkalyq kirister — 100,9%-ke, jergilikti bıýdjetter — 117,1%-ke asyra oryndalǵanyn atap ótti.
Respýblıkalyq bıýdjetke 1781,7 mlrd teńge kiris tústi. Bul jospardan 16 mlrd teńgege, al byltyrǵy jyldyń tórt aıynyń kórsetkishinen 173 mlrd teńgege artyq. О́sý qarqyny 110,7% quraıdy. Jospardyń artyǵymen oryndalýy negizinen salyqtar boıynsha qalyptasty. Olardyń ishinde, ústeme tabys salyǵy — 8,5 mlrd teńge, shıki munaıǵa salynatyn eksporttyq keden baj salyǵy — 32,1 mlrd teńge.
Jergilikti bıýdjetterdiń kiristeri 106 mlrd teńgege artyǵymen oryndalyp, 728 mlrd teńgeni qurady. Memlekettik bıýdjet shyǵystary 96,6%-ke, respýblıkalyq — 96,9%, jergilikti bıýdjetter — 98%-ke atqaryldy.
«Aldaǵy basty maqsat – naqtylanǵan bıýdjettegi qosymsha berilgen qarajattyń túpkilikti tutynýshylarǵa jáne ekonomıkalyq aınalysqa ýaqytynda jetýin qamtamasyz etý. Bul jumysty respýblıkalyq bıýdjettik baǵdarlamalar ákimshileri men jergilikti atqarýshy organdarmen birlesip oryndaımyz», — dedi B. Sultanov.
Investısııalar jáne damý mınıstri J. Qasymbektiń aıtýynsha, salanyń negizgi kórsetkishteri boıynsha naqty kólem ındeksi oryndaldy. Məselen, qańtar–sáýir aılarynda temir rýdasynyń NKI 103,9%; tústi metall kenderin óndirý boıynsha — 102,1%; farmasevtıkalyq ónimderdi óndirý boıynsha — 107,7%; metallýrgııa boıynsha — 104,1%; qurylysta — 102,1% qurady. Osy jyldyń qańtar–sáýir aılarynda transport boıynsha NKI — 104,6% qurady.
2018 jyldyń 4 aıyndaǵy energetıka salasynyń negizgi ekonomıkalyq kórsetkishteriniń aldyn-ala qorytyndylary týraly baıandaı otyryp, energetıka mınıstri Qanat Bozymbaev munaı jáne kondensat óndirý kólemi 2017 jyldyń sáıkes kezeńimen salystyrǵanda 105,9% nemese osy jyldyń 4 aıynyń josparynyń 104,5% quraıtynyn atap ótti.
«2018 jyldyń 4 aıynda 24,1 mln tonna munaı eksporttaldy, bul 2017 jyldyń osyndaı kezeńimen salystyrǵanda 104,3 % quraıdy. Munaı óńdeý kólemi 5,1 mln tonnany nemese osy jyldyń 4 aıynyń josparyna qaraǵanda 104,6% qurady», — dedi Qanat Bozymbaev.
Jalpy, Aýyl sharýashylyǵy mınıstrliginiń tapsyrysyna sáıkes dızel otynynyń qajettiligi tolyq kólemde oryndaldy. 2018 jylǵy naýryz aıyna kóktemgi egis jumystaryn ótkizý úshin dızel otynynyń usynylatyn baǵasy tonnasyna 156 000 teńgeni (130 tg/l) qurady.
2017 jyldyń osyndaı kezeńimen salystyrǵanda, elektr energııasy 8%-ke artty. Kómir óndirý kólemi ótken jyldyń sáıkes kezeńimen salystyrǵanda 103,2%-ti qurady.
2018 jylǵy 4 aıdaǵy áleýmettik-ekonomıkalyq damý men respýblıkalyq bıýdjettiń atqarylýy máselelerin qaraý qorytyndysy boıynsha QR Premer-Mınıstri Baqytjan Saǵyntaev Úkimettiń ekonomıkalyq blogynyń basshylaryna ekonomıkanyń odan ári ósýin qamtamasyz etý boıynsha tıimdi sharalardy qabyldaýdy tapsyrdy.
Sonymen qatar, Baqytjan Saǵyntaev el ekonomıkasynyń asa joǵarǵy ósý qarqynyn qamtamasyz etý boıynsha Memleket basshysynyń Úkimet aldyna qoıǵan mindetterin únemi este ustaý qajettigin atap ótti.