Bıyl Qostanaı qalasynda kózge súıeldeı bolyp tıetin kórinis paıda boldy. Qostanaı qalalyq Turǵyn úı-kommýnaldyq sharýashylyǵy qaladaǵy Belgisiz soldattyń, Jeńis saıabaǵyna kóshirilgen Lenınniń eskertkishin jáne qala ortalyǵyndaǵy Tyń ıgerýshilerge qoıylǵan eskertkish-keshenin qara boıaýmen boıap qoıdy.
Ádette esketkishterdiń qola túsine kózi úırengen jurttyń qap-qara músin záresin alatyndaı keıipke engen. Bul týraly О́ńirlik kommýnıkasııa qyzmeti ortalyǵynda jýrnalısterge bergen suhbatynda oblystyq mádenıet basqarmasynyń basshysy Erlan Qalmaqov ta qalalyq Turǵyn úı kommýnaldyq qyzmetiniń bul isin túsinbeıtinin aıtty. Mekeme eskertkishterdi boıaý jóninde Mádenıet basqarmasyna eshqandaı habarlaspaǵan. Buryn eskertkishterdi qorǵaý ınspeksııasy bolatyn, eskertkishter men tarıhı nysandardy jóndeý, syrlaý, boıaý, kórkeıtý jumystarynyń barlyǵy onyń erejesine sáıkes memlekettik suranys arqyly júrgiziletin. Bul jóninde oblystyq mádenıet basqarmasyn habardar etetin.
«Múmkin mekeme qandaı da bir sarapshynyń baǵasyna súıengen bolýy kerek, ondaı bolady. Ádette, eskertkishter ózine qaraıtyn mekeme, uıym sarapshylardan olardy qandaı boıaýmen boıaý, qandaı materıaldar paıdalaný kerektigi jóninde nusqaý ala alady. Alaıda zańnamada bul jóninde naqty eshnárse jazylmaǵan», deıdi Erlan Bolatuly.
Oblystyq mádenıet basqarmasy qala ákimi Bazyl Jaqypovqa eskertkishterdiń boıaǵannan keıingi keıpi jóninde óziniń qarsylyǵyn bildirgen akt jibergen.
«Qazir bul iske zańdy túrde aralasatyn Eskertkishterdi qorǵaý ınspeksııasy, ıaǵnı memlekettik organ joq. Al boıalǵan eskertkishterdi qaıtadan ózgertý jóninde de eshteńe aıta almaımyn. Zańda arhıtektýralyq nysandardy boıama degen sóz taǵy joq. Bul talǵam men ádeptiń isi bolsa kerek» dep túıdi Erlan Qalmaqov.
Názıra JÁRIMBET, «Egemen Qazaqstan»