Semeı memlekettik medısına ýnıversıtetinde adam ómirine qaýip tóngen jaǵdaıda qandaı shuǵyl kómek kórsetý kerektigine oraı semınar-trenıng ótkizildi.
Trenıngke shaqyrylǵan jýrnalıster adamnyń júregi qysyp qalǵanda qandaı kómek shuǵyl jasaý kerek, balalar bógde zat jutyp qoıǵanda ne isteý qajet, jaraqat alǵan kezde qoldy, aıaqty qozǵaltpaı ustaý, tańyp baılaý tárizdi alǵashqy kómekterdiń kóptegen túrlerin úırendi.
Bul kýrstar Semeıde tuńǵysh ret uıymdastyrylyp jatyr eken. Búginde respýblıkanyń barlyq aımaǵynda 100-den asa qatysýshy osyndaı trenıngten ótýde.
- Maǵan osy kýrs óte unady,-dedi oblystyq «Rýdnyı Altaı» gazetiniń tilshisi Ekaterına Gýlıaeva,-árıne, biz jýrnalıster túrli oqıǵalardyń ortasynda júremiz. Sonda adamdarǵa kómek kórsetý bizdiń paryzymyz. Osyndaı trenıng uıymdastyryp otyrǵan Semeı memlekettik medısına ýnıversıtetiniń ujymyna úlken rahmet.
Máselen, jol kólik apatyna túsip qalǵanda zardap shekken adamdy jedel járdem kelgenshe aman alyp qalýǵa bolatyndyǵyn jýrnalıster qaýymy trenıng barysynda úırenip, kórip bildi. Áıtpegen kúni tek medısına qyzmetkerlerin ǵana tosyp, ólim aýzyndaǵy adamdy qutqara almaıtyn da jaǵdaılar kezigedi eken.
-Biz bul aksııany jýrnalısterden bastap otyrmyz,-dedi ýnıversıtettiń oqý-jattyǵý ortalyǵynyń dırektory Dınara Muqanova,-Qazaqstanda medısınalyq kómek jetpeı jatyp, ásirese jol apaty kezinde adamdar qaıtys bolyp ketip jatatyn oqıǵalar bar. Bul qazirde 42 paıyzdyq kórsetkishti kórsetip tur. Sondyqtan da paramedık bolýdy úırenip alǵan jón. Paramedık degenimiz bul medısınalyq bilimi bolmasa da, dáriger kelgenge deıin bir jaǵdaı jasap, qınalyp jatan adamnyń ómirin uzartýǵa yqpal etý. Eger biz paramedıkterdiń qataryn kóbeıtsek, adam ómirin saqtap qala alamyz. Máselen, Gollandııada adamǵa alǵashqy kómek berýdi bala kezden, tipti balabaqshadan úıretedi. Jýrnalısterden paramedık daıarlaý arqyly biz osy salany halyqqa keńinen taratpaqpy. Ásirese adam ómirlerin saqtap qalǵymyz keledi.
Raýshan NUǴMANBEKOVA