Ulttyq ǵylym akademııasy tarapynan shyǵatyn tórt akademııalyq jýrnalǵa Slarivate Analytics halyqaralyq kompanııasynyń sertıfıkattary tabys etildi.
«Ǵylym ordasynyń» ǵımaratynda ótken basqosýǵa elimizdiń belgili ǵalymdary jınaldy. UǴA prezıdenti Murat Jurynov qatysýshylarǵa sharanyń negizgi maqsatyn túsindire kele «QR UǴA xabarshysy», «QR UǴA xabarlary. Hımııa jáne texnologııa serııasy», «QR UǴA xabarlary. Fızıka-matematıka serııasy», «QR UǴA xabarlary. Geologııa jáne texnıkalyq ǵylymdar serııasy» basylymdarynyń halyqaralyq derekter qoryna enýine qazaqstandyq ǵalymdardyń qosqan úlesi joǵary ekendigin atap ótti.
M.Jurynuly sonymen qatar UǴA tarapynan 1946 jyldan bastap ǵylymı baǵytta shyǵatyn 8 basylymnyń ótken ǵasyrdyń 60-70-jyldarynan bergi aralyqta joǵary deńgeıdegi jýrnaldardyń halyqaralyq tiziminde turǵandyǵyna toqtaldy. Búginde bul jýrnaldar AQSh, Ulybrıtanııa, Germanııa, Fransııa, Japonııa, Qytaı sııaqty álemniń 73 memleketiniń iri kitaphanalaryna taralady. Al 2016 jyly «QR UǴA Habarlary. Geologııa jáne tehnıkalyq ǵalymdar serııasy» jýrnaly halyqaralyq Scopus málimetter qoryna engen. Bul Orta Azııa respýblıkalary ǵylym akademııalarynyń basylymdary arasynda atalǵan derekter qoryna engen birden-bir jýrnal bolyp tabylady.
Álemdik zertteýshiler qaýymdastyǵynyń áriptesi bolyp tabylatyn Slarivate Analytics halyqaralyq kompanııasynyń (AQSh) ókili, Reseı jáne TMD boıynsha dırektory O.G.Ýtkın ǵalymdarǵa, jýrnal redaktorlaryna birlesken jumystary úshin úlken alǵysyn bildirdi. Búginde halyqaralyq reıtıngti málimetter qorynda Qazaqstanda shyǵatyn 10 jýrnal tirkelgen. Slarivate Analytics kompanııasy ǵylymı ortaǵa saraptamalyq derekter usynyp, tehnologııadaǵy úderisterdi jyldam meńgerýge múmkindik berip qana qoımaı, ınnovasııalyq salada básekege qabilettilikti kúsheıtýge yqpal etetin bedeldi málimetter ortalyǵy bolyp tabylady. Otandyq ǵylymnyń dárejesi men deńgeıin kórsete otyryp, álemniń eń yqpaldy degen jýrnaldarymen bir keńistikte shoǵyrlanýy akademııalyq jýrnaldardyń bedelin arttyrýmen qatar, taıaý jyldarda damý barysyna zor yqpalyn tıgizetini sózsiz. Osy tujyrymdy ortaǵa tastaǵan ǵylymı orta álemdik zertteýler júıesinde bolyp jatqan úderisterdi der kezinde meńgerý qazaqstandyq ǵylymǵa jańa serpin beredi degen senimde.
Elvıra SERIKQYZY,
«Egemen Qazaqstan»
ALMATY