Búgin Astana ekonomıkalyq forýmy aıasynda QR Premer-Mınıstri Baqytjan Saǵyntaev Eýropa qaıta qurý jáne damý bankiniń (EQQDB) birinshi vıse-prezıdenti Iýrgen Rıgterınkpen kezdesý ótkizdi.
Kezdesý barysynda taý-ken salasy, mýnısıpaldyq jáne kólik ınfraqurylymyn qosa alǵanda, ekonomıkanyń túrli sektorlaryndaǵy, «jasyl» ekonomıka men jańartylatyn energetıkany damytý, Qazaqstannyń jahandyq básekege qabilettiligin jaqsartý men basqa da salalardaǵy qazirgi jáne keleshektegi birlesken jobalardy iske asyrý máseleleri talqylandy.
EQQDB yntymaqtastyǵynyń 20 jyldan astam ýaqyty ishinde Qazaqstanda jalpy quny €7,3 mlrd bolatyn 240 birlesken joba qarjylandyryldy. 2017 jyly quny $700 mln astam bolatyn 25 jańa jobaǵa qol qoıyldy.
Qazaqstandaǵy EQQDB jobalarynyń qazirgi qorjyny €3,1 mlrd bolatyn 118 jobadan turady. Olardyń qatarynda «Qyzylorda — Jezqazǵan — Qaraǵandy — Temirtaý — Astana» baǵyttary boıynsha júrgiziletin «Saryarqa» magıstraldi gaz qubyrynyń qurylysy, «Ortalyq — Ońtústik» dáliziniń «Kúrti — Qapshaǵaı» aýmaǵyn rekonstrýksııalaý» jobasy, «Samuryq-Qazyna» UÁQ aktıvterin ótkizý boıynsha, avtokólik joldarynyń aqyly júıelerin engizý boıynsha, «Astana — Qaraǵandy — Balqash — Kúrti — Qapshaǵaı — Almaty» avtokólik jolynyń «Ortalyq — Ońtústik» dálizin rekonstrýksııalaý» jobasy týraly, «Kúrti — Býrylbaıtal 2152-2214 shaqyrym (62 shaqyrym)», «Aqtóbe, Jambyl jáne Ońtústik Qazaqstan oblystarynyń sý sharýashylyǵy jáne gıdromelıorasııalyq júıelerin rekonstrýksııalaý» jáne basqa da jobalar bar.