Búgin Astanada Qazaqstan Prezıdenti Nursultan Nazarbaevtyń qatysýymen Global Challenges Summit 2018 forýmynyń jalpy otyrysy bastaldy. Ekonomıkalyq damý jáne resýrstyq turaqtylyq, sıfrlandyrý jáne ýrbanızasııa, uzaq ómir súrý jáne qarjy tóńkerisi, jahandyq qaýipsizdik jáne mádenı órleý - osynaý jalpyadamzattyq tendensııalardyń bári jańǵyrǵan Astana ekonomıkalyq forýmy Global Challenges Summit 2018 baǵdarlamasynyń ózegin qurap otyr.
Forýmǵa álemniń túrli elderinen 500-ge jýyq spıker qatysady. Bul AEF-tiń rekordtyq kórsetkishi. Top-spıkerler arasynda Fransııanyń burynǵy prezıdenti Fransýa Olland, BUU-nyń burynǵy bas hatshysy Pan Gı Mýn, Dúnıejúzilik banktiń Eýropa jáne Ortalyq Azııa jónindegi bas ekonomısi Gans Tımmer, fızık, fýtýrolog Mıtıo Kaký, Golman Sachs burynǵy tóraǵasy Djım O'Nıl, Apple kompanııasynyń negizin qalaýshylardyń biri Stıv Voznıak, Reseı prezıdenttigine úmitker bolǵan Ksenııa Sobchak jáne ózge de tulǵalar qatysady. Forýmnyń alǵashqy eki kúngi kúntártibi jahandyq máselelerge arnalady, úshinshi kúni spıkerler QR Úkimetiniń, sarapshylar qoǵamdastyǵynyń ókilderimen alty baǵyt boıynsha jumys júrgizetini kútilýde.
Kongrestiń 10 jyldyq jumysy barysynda oǵan álemniń 150 elinen 50 myń delegat, sonyń ishinde 20-dan astam Nobel syılyǵynyń ıegerleri, 30-dan astam sheteldik joǵary deńgeıli saıası qaıratkerler kelgen. Kongress aıasynda jalpy quny 20 mlrd dollardan asyp jyǵylatyn 300-den astam memorandým jáne kelisimderge qol qoıyldy. Ár jyldary forýmda álemdik deńgeıdegi saıasatkerler, ǵalymdar, ekonomıster, jýrnalıster jáne qoǵam qaıratkerleri, halyqaralyq uıymdardyń, qarjy ınstıtýttarynyń, bıznes-elıtanyń ókilderi spıker boldy.
Sýretti túsirgen Erlan Omarov,
«Egemen Qazaqstan»