Japonııanyń Qazaqstandaǵy elshiligi respýblıkalyq «Saryarqa» velotreginiń jekpe-jek zalynda «Qazaqstandaǵy kendo klýbyna» kendo sportyna qajetti sporttyq kıimderin tapsyrý rásimin ótkizdi.
Atalǵan sharaǵa Japonııanyń Qazaqstandaǵy Tótenshe jáne ókiletti elshisiniń keńesshisi Okava Sıýıtıro, Sport jáne dene shynyqtyrý isteri komıteti tóraǵasynyń orynbasary Bekbolat Baıjanov, sondaı-aq klýbtyń negizin qalaýshy Erkin Tátishev qatysty. Japonııalyq tarap qazaqstandyq kendo klýbyna 20 dana kıim-jabdyqty syıǵa tartty. Sonymen qatar japonııalyq tarap bolashaqta atalǵan sportty Qazaqstanda qarqyndy damytý úshin jumystar jasalatyndyǵyn atap ótti.
Saltanatty jıynda Japonııa elshisiniń keńesshisi Okava Sıýıtıro sóz sóılep, eki eldiń yntymaqtastyǵy, áriptestigi keńinen damyp kele jatqanyn aıtty.
«2016 jyly «Jekpe-jek óneri sheberleriniń Ortalyq Azııa elderine sapary» jobasy aıasynda Qazaqstanǵa Japonııadaǵy kendo federasııasynyń tórt kendo sheberi jáne Japonııa premer-mınıstri Sındzo Aıýe kelgen bolatyn. Olar kelgen ýaqytta qazaqstandyq sportshylar bul sport túrine qajetti saımandardy Qazaqstannan tabý qıyn ekendigin jetkizgen. Osyǵan baılanysty, Japonııadaǵy kendo federasııasy bul qural-saımandar men kıim-keshekti kendony Qazaqstanda keńinen tanytý úshin syıǵa tartýda», dedi Okava Sıýıtıro.
Aıta keteıik, Qazaqstandaǵy kendo sport klýby 2004 jyly Aıkıdo mektebi bazasynda Almatyda qurylǵan. 2004 jyldan bastap kendo klýby tájirıbe úshin qazaqstandyq sportshylarǵa turaqty túrde issapar uıymdastyryp turady. Klýb músheleri túrli belgili japonııalyq mamandarmen Tokıo, Nııgata, Kofý, Chıchıbý, Sandzıo jáne taǵy basqa qalalarda tájirıbelerin jetildirip turady.
Álı BITО́RE,
«Egemen Qazaqstan»