Arqadaǵy saparyn Alataý baýraıynda jalǵastyrǵan S.A.Gerasımov atyndaǵy Búkilreseılik memlekettik kınematografııa ınstıtýtynyń (BMKI) shyǵarmashylyq ujymy júz jyldyq mereıtoılaryna arnalǵan iskerlik kezdesýlerin «Dostyq» úıinen bastady.
T.Júrgenov atyndaǵy Qazaq ulttyq óner akademııasy ókilderi uıymdastyryp otyrǵan shara «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý jáne Astananyń 20 jyldyǵyna arnalǵan. Kınematografııanyń maıtalmandarymen kezdesýdiń alǵashqy sózin alǵan Qazaqstannyń eńbek sińirgen qaıratkeri S.Ázimov qazaq kınosynyń tarıhy BMKI-men tyǵyz baılanysty ekendigine toqtaldy. Qandaı qıyn-qystaý kezeńderde de óner salasyna turaqty mamandar daıarlap otyrǵan BMKI-diń soǵys jyldarynda Almatyǵa qonys aýdarǵany belgili. Osylaısha el basyna kún týǵan jyldarda da kıno óneri óshken joq. Kerisinshe, óz kásibiniń myqty degen mamandary tárbıelendi. Kásibı sheberhanalar qalyptasty. Búginde BMKI-de bilim alǵan qazaqstandyq kınogerler sany júz elýden asady.
Atalǵan oqý ornymen beıbit zamandaǵy áriptestikter týraly sóz qozǵaǵan T.Júrgenov atyndaǵy Qazaq ulttyq óner akademııasynyń rektory B.N.Núsipjanovanyń aıtýynsha, qazaqstandyq stýdentter úshin tájirıbe almasyp, bilimderin jetildirýge baılanysty qolaıly jaǵdaılar jasalǵan. Kıno salasyna mamandanǵan stýdentterdiń jumystaryna búginde joǵary baǵa berilýde. Aldaǵy ýaqytta qazaqstandyq stýdentter BMKI-de operator mamandyǵy boıynsha bilim alatyn bolady.
Al Qazaqstanǵa kelý áserlerin tereń tebirenisten bastaǵan RF Halyq ártisi S.A.Solovev, BMKI rektory, professor S.V.Malyshev, RF Halyq ártisi, professor V.Iý.Abdrashıtov, Reseı jáne Qazaqstannyń eńbek sińirgen ártisi N.О́.Arynbasarova Almatynyń erekshe qala ekendigin jetkizdi. «Alataý baýraıyndaǵy ásem qalanyń ár kóshesinde bizder úshin meıram bolyp jatqandaı...» dep áserli kúılerin ortaǵa saldy. Máskeýlik meımandar kınogerler sheberhanasynyń qalyptasýy týraly estelikterimen bólise otyryp, biz úzim nandy bóle jegen jyldarda postkeńestik elderdiń óner ókilderin osy bir qasıetti mamandyq keńistiginde taǵdyrlary toǵystyrǵandyǵyn saǵynyshpen eske aldy. Búgingi kıno tóńiregindegi pikirlerimen de bólisip otyrdy. Ary qaraıǵy kezdesý BMKI-diń qazaqstandyq túlekterimen qaýyshýmen jalǵasyn tapty.
Al keshki Almaty meımandardy Lermontov atyndaǵy Memlekettik akademııalyq orys teatrynda qarsy aldy. Munda ınstıtýttyӊ daryndy stýdentteri almatylyq kórermender úshin «Evgenıı Onegın», «Mnogo shýma ız nıchego» jáne «Govorıashıı nemoı» spektaklderin qoıdy.
Eki kúngi sapary aıasynda BMKI professorlyq quramy kásibı qazaqstandyq joǵarǵy oqý oryndarynyӊ stýdentteri úshin rejıssýra, anımasııa, sahnalyq qozǵalys, beıneleý óneri boıynsha sheberlik synyptaryn ótkizdi.
Elvıra SERIKQYZY,
«Egemen Qazaqstan»
ALMATY