Atyraýlyq jas qalamgerlerdiń tyrnaqaldy týyndylary jınaqtalǵan kitap jaryq kórdi. Oblys ákimdiginiń qoldaýymen oblystyq mádenıet, arhıvter jáne qujattama basqarmasynyń tapsyrysy negizinde shyqqan antologııa «Alaýjyr» dep ataldy.
Oǵan Atyraýdaǵy «Farıza juldyzdary» klýby músheleriniń shyǵarmalary engen. Atalǵan klýb eki jyl buryn qurylǵan edi. Jaıyq jaǵasyndaǵy jasampaz jastardyń ádebıet álemine attaǵan alǵashqy qadamdary oń bolyp, túrli ádebı baıqaýlarda júldeger atandy, merzimdi basylymdarda týyndylary jarııalanyp keledi. Qazirdiń ózinde Ulmeken Sháýkenova, Áıgerim Túsipqalıeva, Rahymjan Asqar, Asylanbek Shyǵyrov, Rabbına Batý, Erkenaz Qalıjan, Asylaı Nııazbaeva sekildi jas aqyndar oqyrmannyń jyly yqylasyna ıe bolyp júr. Halyqaralyq «Shabyt» shyǵarmashyl jastar festıvaliniń júldegerleri Baqytgúl Sármekova, Nurgúl Ysmaǵulova, Nárkes Baltoǵaevalardyń da áńgimeleri jınaqqa engen.
-Buryn Atyraýda «Jasdáýren» atty ádebı birlestik qurylǵan. Meńdekesh Satybaldıev, Farıza Ońǵarsynova, Qadir Júsip sekildi aǵa-apalarymyz sol birlestiktiń qatarynda boldy. Sonyń izinde «Farıza juldyzdary» atty jas qalamgerler klýbyn ashtyq. Bul Elbasynyń «Rýhanı jańǵyrý» baǵdarlamasy aıasynda qolǵa alynǵan ıgi isterdiń biri, - deıdi klýb jetekshisi, aqyn Álııa Dáýletbaeva. - «Alaýjyr» antologııasyna klýb quramyndaǵy 25 aqyn-jazýshynyń shyǵarmalary kirdi. Jastyq áýenderi oqyrmandy beı-jaı qaldyrmaıdy degen oıdamyz.
Ǵ.Slanov atyndaǵy oblystyq ǵylymı-ámbebap kitaphanasynda antologııanyń resmı tanystyrylymy ótti. Qoǵam qaıratkeri, «Atyraý oblysynyń qurmetti azamaty» Mádına Ǵabdýsalımova men QR Jazýshylar Odaǵynyń múshesi О́tepbergen Álimgereev jańa kitaptyń lentasyn qııý qurmetine ıe boldy. Sharada aımaqtaǵy zııaly qaýym ókilderi, qoǵam qaıratkeri Ráshıla Múrsalıeva, aqyndar Jeńis Aronov, Tólegen Jańabaev, ólketanýshy Abat Kenjeǵalıevter jastarǵa jyly lebizderin arnady.
Baqytgúl BABASh,
«Egemen Qazaqstan»
ATYRAÝ