Jaqynda respýblıka boıynsha barlyq mektepterde jalpyulttyq ata-analar jınalysy ótti. Ár ata-anany bala tárbıesine belsene aralastyrý maqsatynda uıymdastyrylǵan is-shara 15 mamyr halyqaralyq otbasy kúnine týra keldi. Jınalys týraly Bilim jáne ǵylym mınıstri Erlan Saǵadıev 25 sáýirde Astana qalasynda ótken halyq aldynda esep berý kezdesýiniń qorytyndysy boıynsha Ortalyq kommýnıkasııalar qyzmetiniń baspasóz máslıhatynda habarlaǵan bolatyn.
Mınıstr ata-analar jınalystaryna adamdardyń qatysý deńgeıi óte tómendep ketkendigin aıtqan. «Adamdardyń tek 10 paıyzy ǵana qatysady» degen vedomstvo basshysy mamyrdyń 15-si kúni barlyq memlekettik organdar men mekeme basshylaryna ata-analardy jınalysqa ýaqytynda jiberýge Úkimet tarapynan tapsyrma berýdi surady.
Sondaı jınalystardyń biri Astana qalasyndaǵy Tólegen Aıbergenov atyndaǵy №16 orta mektepte ótti. «Bilimdi ult – oqý sapasy jáne otbasylyq qundylyqtar» atty taqyrypta bas qosqan jıynǵa ata-analar men ustazdar qatysty. Joǵaryda aıtyp ketkendeı, basqosýdyń negizgi maqsaty ata-analardy memlekettik bilim saıasatynyń baǵyttarymen tanystyrý, orta bilim berý júıesiniń jetistikteri jáne mektepti basqarýdaǵy pedagogtar men ata-analardyń kúshin biriktirý týraly habarlaý bolatyn.
Ata-analar jınalysyn mektep dırektory Baljan Aıtmuhametova ashyp berdi. О́z baıandamasynda mektep basshysy Qazaqstandaǵy jańa bilim standarttary týraly aıtty. Jıynǵa qatysqan ata-analardyń kóbi matematıka, orys tili, qazaq tili pánderine qatysty jańartylǵan bilim mazmuny jaıly suraqtar qoıdy. Sondaı-aq ata-ana Inara Týrbasova krıterııli baǵalaýǵa baılanysty saýal joldady.
Oǵan mektep dırektory «Krıterııli baǵalaý bilimniń maqsaty men mazmunyna sáıkes keletin, aıqyn anyqtalǵan, ujymmen shyǵarylǵan, bilim prosesiniń belgili krıterııleri oqýshylardyń oqý jetistikterin salystyrýǵa negizdelgen prosess», dep jaýap berdi.
Basqosýda atalǵan mekteptiń bolashaq josparlary týraly da sóz boldy. Qoıylǵan suraqtardyń ishinde mekteptiń kúrdeli jóndeýine qatysty, jan basyna shaqqandaǵy qarjylandyrýǵa aýystyrý, aqyly bilim qyzmetin kórsetý úshin qazynashylyqta shot ashý týraly máseleler kóterildi.
Larısa Kapchenko esimdi ata-ana uzartylǵan toptaǵy sabaqtardyń baǵasy týraly suraq qoıdy. Saýalǵa mekeme basshysy «Astana qalasy bilim basqarmasynyń 2017 jylǵy 14 jeltoqsandaǵy №771 buıryǵyna sáıkes memlekettik jalpyǵa mindetti bilim standarttarynyń talaptarynan tys Astana qalasynyń memlekettik qazynalyq bilim mekemeleri iske asyratyn aqyly bilim qyzmetterin berý quny saǵatyna 450 teńgeni quraıdy», dep jaýap berdi.
Mıras ASAN, «Egemen Qazaqstan»
ASTANA