Elimizdegi úlkendi-kishili qalalar, sonyń ishinde oblys ortalyqtary elordaǵa qarap boı túzese, órkendeýdiń jańa bir órisi ashylary anyq. Sondaı-aq osy arqyly óńiraralyq yntymaqtastyqty odan ári damytý isine de sony serpin berilmek. Eki jaqqa da paıdasy mol qarym-qatynastar Astananyń 20 jyldyǵy qarsańynda túndigin túrip jatsa, tipten ǵanıbet. Osy oraıda Aqtóbede 3 kúnge sozylǵan Astana qalasynyń Aqtóbe oblysyndaǵy kúnderi ınvestısııalyq jobalardy birlesip ıgerý men óńiraralyq kooperasııanyń kókjıegin keńeıtýge úlken septigin tıgizdi deýge ábden bolady.
Bul rette Aqtóbe aımaǵynda respýblıkanyń ózge óńirlerimen saýda-ekonomıkalyq qatynastardy damytýda irgeli de ilkimdi ister qolǵa alynǵanyn atap ótý kerek. Endigi kezek Astana men Aqtóbe oblysy arasynda ornyǵyp otyr. Ásirese atalǵan eki óńir arasynda buǵan deıin EKSPO-2017 kórmesi aıasynda ómirsheń jobalar júzege asyrylǵan-dy. Qazirgi kúni Aqtóbe ónimderin Astana naryǵyna jetkizýdiń keń aýqymdy baǵdarlamasy belgilengen. Buǵan qajetti basty faktordyń biri tıisti áleýet bolýynda, onyń qalyptasa bilýinde emes pe. Bul jóninen óńir mártebesi bıik tur.
– Biz elordalyq kásipkerlerge «Aqtóbe» ındýstrııalyq aımaǵynan 200 gektar jer telimi men tegin ınfraqurylym usynýǵa ázirmiz. Al óz kezeginde Astana bizge qandaı kómegin tıgizbek? Biz Astanadan neni úırenip, neni kóńilge túıe alamyz? Sóz joq, elordadaǵy aýmaqtardy abattandyrý jobalary qyzyqtyrmaı qoımaıdy. Sondaı-aq qoǵamdyq keńistikti qalyptastyrý men qala qurylysy saıasatyn ońtaıly júrgize bilý isinde de úırenetin úrdister mol. Astananyń turǵyn úı-kommýnaldyq sharýashylyq salasyn órkendetý isindegi tájirıbesinen de óńirler ózderine qajettisin ala alady, deıdi Aqtóbe oblysynyń ákimi Berdibek Saparbaev.
О́z kezeginde Astana qalasy ákiminiń orynbasary Ermek Amanshaev eki jaqta qalyptasa bastaǵan ınvestısııalyq áleýet óńiraralyq yntymaqtastyqtyń nátıjeli bolýyna jáne básekege qabilettilik deńgeıin kóterýge oń yqpalyn jasaı alatynyn jetkizdi. Al «Astana» áleýmettik-kásipkerlik korporasııasy» UK AQ-tyń tóraǵasy Nurlan Jaqypov óńiraralyq baǵdarlamalardyń bir-birimen ózara úılesimdi bolýy turǵysynan oı órbitti. Ári ekonomıkany sıfrlandyrýdyń ınnovasııalyq tutqalaryn saralaı otyryp engizý qajettigine toqtaldy. Onyń oıynsha bıznesti damytýda sıfrly marketıngtiń atqaratyn róli joǵary.
Astananyń Aqtóbedegi kúnderi aıasynda ótkizilgen bıznes-forým kezinde Aqtóbe qalasyndaǵy «Darý» qalpyna keltirý ortalyǵynyń bas dırektory Ǵalymjan Eleýov memleket-jekemenshik áriptestigi aıasyndaǵy birlesken jobalar eki jaqqa da tıimdi ekenin túıindep berdi. «Aqtóbede respýblıka óńirleri arasynda balamasy joq medısınalyq klaster qurylǵan. Bul Astana men Aqtóbe klınıkalary arasyndaǵy ózara baılanystardy tereńdetýge áser ete alady», dedi ol budan ári. Sondaı-aq Aqtóbe qalasynyń ákimi Ilııas Ispanov oblys ortalyǵynyń strategııalyq damý sıpatyn jasaqtaý ústinde óńiraralyq yntymaqtastyq jańa serpin bere alatynyna ekpin túsirdi.
Astana kúnderi kezinde taýar óndirýshiler men óńirlerdi damytý ortalyǵynyń ókilderi basqosýdyń bergeni mol bolǵanyn atap kórsetti. «Osy kúnderde birqatar máseleler ýaqyt ozdyrmaı tez sheshimin tapqany da bir mártebe. Atap aıtqanda, Aqtóbeden Astanaǵa qurylys materıaldary men sút ónimderin jetkizý týraly máseleler sheshimin tapqany, al elordalyq kompanııalar Aqtóbege «e-KSK» elektrondy júıesi men kóshe jaryǵyna qatysty aqyldy basqarý júıesin engizýge bastamashyldyq tanytqany osy pikirimizdiń aıǵaǵy. Jaryqtandyrýdyń atalǵan ıntellektýaldyq júıesi elektr energııasyn asa kóp mólsherde únemdeýge septigin tıgizedi», deıdi astanalyq «LED Colution» JShS dırektory Qanybek Aıtaqov.
Túıip aıtqanda, Astananyń Aqtóbe oblysyndaǵy kúnderi óńiraralyq kooperasııamen yntymaqtastyqty damytýdyń jańa paraqtaryn ashyp berdi.
Temir QUSAIYN, «Egemen Qazaqstan» AQTО́BE