Ishki ister mınıstrligi Tótenshe jaǵdaılar komıtetinde adamdar jappaı jınalatyn obektilerdegi órt qaýipsizdigi salasyn memlekettik baqylaý boıynsha tekserýler qorytyndylaryna, 2018 jylǵy jazǵy maýsymǵa ázirlik máselelerine arnalǵan brıfıng ótti. Oǵan Ishki ister mınıstriniń orynbasary Iý.Ilın qatysty.
Jıynda belgili bolǵandaı, azamattyq qorǵaý organdary 2018 jylǵy 2 sáýirden bastap adamdar jappaı jınalatyn saýda obektileriniń órtke qarsy júıesine tekserýdi júzege asyrǵan. Tekserilgen obektilerde 15 myńnan astam buzýshylyq anyqtalǵan. Barlyq kináliler ákimshilik jaýapkershilikke tartylyp, nátıjesinde 18 mln teńgeden astam aıyppul óndirilgen. Obektiler basshylaryna buzýshylyqtardy joıý týraly uıǵarymdar berilgen.
Jalpy, buzýshylyqtar evakýasııalaý joldaryna, sonyń ishinde qosalqy esikterdiń jabyq bolýyna, esikterdiń evakýasııa joly boıynsha ashylmaýyna, evakýasııa joldarynda jáne baspaldaqtar astynda saýda núkteleriniń ornalasýyna jáne t.b. máselelerge qatysty bolǵan. Sondaı-aq tekserýler barysynda elektr jabdyqtaryn durys montajdamaý, elektr symdarynyń oqshaýlaý kedergisine revızııa júrgizilmeýi, avtomattandyrylǵan órt dabylynyń jáne qulaqtandyrý júıesiniń jaramsyz kúıde bolýy, qyzmetkerlerge órt qaýipsizdigi boıynsha nuqsaýlyqtan nemese órt-tehnıkalyq mınımýmnan ótkizbesten jumys isteýge ruqsat berý, órtke qarsy sýmen qamtamasyz etý isine tekserý júrgizilmeýi, alǵashqy órt sóndirý quraldary ne jaramsyz, ne jetkiliksiz bolýy jáne basqa da faktiler tirkelgen.
Tekserýler kezinde personalmen, kúzet qurylymymen jáne obektige kelýshilermen mindetti túrde órt qaýipsizdigi talaptaryn saqtaý boıynsha nusqaýlyqtar jáne órt jaǵdaıyndaǵy is-qımyldar boıynsha mashyqtanýlar ótkizilgen. Búginde 41 myńnan astam adam oqytylǵan. Budan ózge, iri saýda obektilerinde órt sóndirý qyzmetteri 494 órt-taktıkalyq oqý-jattyǵýyn iske asyrǵan.
Adamdar jappaı jınalatyn obektilerdiń qaýipsizdigin saqtaý maqsatynda IIM tıisti Jol kartasyn ázirlegen jáne ol kelisý rásiminen ótýde. Jol kartasynda memlekettik baqylaýdy qatańdatý, qoǵamdyq baqylaýdy kúsheıtý, qurylys normalary men qaǵıdalar jıyntyqtaryn, tirshilik áreketi negizderin oqytý júıesin qaıta qaraý máselelerin qarastyrý kózdelgen.
Taǵy bir aıta keter jaıt, óńirlerdiń halqy men aýmaǵyna úlken qaýip tóndirýshy tabıǵı (orman jáne dala) órtter bolyp tabylady. Keltirilgen derekter boıynsha, jyl saıyn elimizde orta eseppen 4 myń tabıǵı órt pen janý bolady, jalyn qushqan jalpy aýdany 300 myńǵa deıin jetedi, órtten kelgen nuqsan 120 mln teńgeden asady. Al orman órtiniń shamamen 80%-y adamnyń kinásinen oryn alady eken.
Tabıǵı órtterdiń aldyn alý jáne den qoıý boıynsha sharalar qabyldaý maqsatynda IIM múddeli ortalyq memlekettik jáne jergilikti atqarýshy organdarmen birlese 2018 jylǵy jazǵy kezeńge arnalǵan orman jáne dala órtteriniń aldyn alý jáne joıý boıynsha jyl saıynǵy is-sharalar josparyn ázirlegen. Budan bólek, eldegi órt qaýpi jaǵdaıyna shuǵyl den qoıý tártibin anyqtaý maqsatynda aımaqaralyq sıpattaǵy orman-dala órtterin joıatyn úkimettik jospar túzildi. Orman-dala alaptaryn kúndelikti patrýldeý úshin órt qaýpi kezeńiniń basynan bastap memlekettik tekserý, jergilikti polıseı qyzmeti jáne orman sharýashylyǵy mekemeleriniń qyzmetkerleri tarapynan mobıldi toptar qurylǵan.
TJK aýmaqtyq bólimsheleri orman-dala alaptarynda órtterdiń profılaktıkasy aıasynda 4,5 myńnan asa adamdy qamtı otyryp, 243 nusqama, 75 jıyn jáne 42 dóńgelek ústel, sondaı-aq 25 birlesken oqý-jattyǵý uıymdastyrǵan.
Joldybaı BAZAR, «Egemen Qazaqstan»