Aqmola oblysynda memlekettik qyzmet júıesinen ketken qyzmetkerler sany aıtarlyqtaı azaıdy. Memlekettik qyzmet isteri jáne sybaılas jemqorlyqqa qarsy is-qımyl agenttigi Aqmola oblysy boıynsha departamentiniń basshysy Bergen Bespalınov osy jyldyń birinshi toqsanyn qorytyndylaǵan brıfıng barysynda osyndaı málimetti kóldeneń tartty.
Departament basshysynyń paıymynsha, memlekettik qyzmet salasynda júrgizilgen reformanyń oń yqpaly nátıjesinde oblysta memlekettik qyzmet quramynda kadrlyq turaqtylyq ornaǵan. «Búgingi tańda memlekettik qyzmet organdaryndaǵy bos oryndar 7,1 paıyzdy qurasa, 2016 jyly bul kórsetkish 11 paıyz bolǵan edi. Qyzmet aýystyrý kórsetkishteri de turaqty túrde tómendep keledi. Jyl basynan bergi kórsetkish 0,9 paıyzdy qurasa, ótken jyldyń osy merziminde ol 1,6 paıyz deńgeıinde bolatyn», dedi B.Bespalınov óz sózinde. Sondaı-aq joǵary laýazymǵa taǵaıyndalǵan memlekettik qyzmetshiler sany da aıtarlyqtaı artqan. Atap kórsetkendeı, bıylǵy jylda ishki konkýrstardy ótkizýdiń nátıjesinde joǵary laýazymǵa memlekettik qyzmetkerlerdiń 70 paıyzy taǵaıyndalypty. Bul rette sybaılas jemqorlyqtyń aldyn alý maqsatynda oblystyq «Adal jol – Chestnyı pýt» sybaılastyqqa qarsy kúres marafony júrgizilýde. Maqsat – sybaılastyqtyń zııany týraly aqparatty oblystyń árbir turǵynyna jetkizý.
Osymen tórtinshi jyl qatarynan ótkizilip kele jatqan sharaǵa qatysýshylar sany artyp keledi. Búgingi tańda oblystyń tórt óńirinde 9 myń adamdy qamtyǵan marafon uıymdastyryldy. Reti kelgende aıta ketý kerek, «Qoǵamdyq baqylaý kartasy» jobasy sheńberinde kez kelgen adam Agenttikke aqparat jibere alady jáne onyń qaralý merzimi 10 kún dep belgilengen. Aqmola oblysynda qolǵa alynǵan bul joba óziniń nátıjesin de bere bastady.
Jalpy, Aqmola oblysynda ústimizdegi jyldyń birinshi toqsanynda 53 sybaılas jemqorlyq isi tirkelipti. Alaıda sybaılastyqpen kúreste bir mekemeniń kúshi jete bermeıdi. Sondyqtan bul iske qoǵamdy keńinen tartý qajettigi basa aıtyldy.
Asqar TURAPBAIULY, «Egemen Qazaqstan»
Aqmola oblysy