Qasıetti Ramazan aıynyń alǵashqy kúni Qyzyljar meshiti alty júzdeı adamǵa dastarhan jaıyp, aýyzashar berdi.
Aldymen Túrkııadan taraýyh namaz oqyp, hatym quran túsirýge kelgen qarılar quran oqyp, odan keıin oblys ákiminiń orynbasary Madııar Qojahmet, ardagerler keńesiniń tóraǵasy Eskendir Eleýsizov, Zeınolla qajy Oljabaev, sheshen-ıngýsh, ázirbaıjan, tatar-bashqurt, túrik, qyrǵyz etnomádenı birlestikteriniń jetekshileri musylman jamaǵatyn oraza aıynyń bastalýymen quttyqtady. Olar óz sózderinde jınalǵandardy meıirimdilik, baýyrmaldyq qasıetterge úndedi.
Oblystyń ókil ımamy, Qyzyljar meshitiniń bas ımamy Kenjetaı qajy Dúısenbaı óz sózinde oneki aıdyń tóresi-Ramazan aıynyń sansyz mol saýaby jaıly tartymdy áńgimelep berdi. Jetim-jesirlerge shyn yqylastarymen kómektesip, dastarhan jaıyp júrgen Asqar Medıev, Jomart Qajyrahymov, Serik Eskendiruly sekildi azamattardyń atyna rızashylyq bildirdi. Qaıyrymdylyq sharalaryna belsene qatysyp júrgen bir top adamǵa alǵys hattar men eskertkish syılyqtar tapsyryldy.
Dıaspora ókilderi turmysy tómen otbasylar men az qamtylǵan jandar úshin aýyzashar ótkizetinderin, basqa da qaıyrymdylyq sharalaryn uıymdastyratynyn jetkizdi.
О́mir Esqalı,
«Egemen Qazaqtsan».
Soltústik Qazaqstan oblysy.