Atyraýda jastar eńbek bırjasy uıymdastyrǵan bos jumys oryndary jármeńkesi ótti, dep habarlaıdy Atyraý oblystyq О́ńirlik kommýnıkasııalar qyzmeti.
«Apec Petrotechnic» joǵary kolledjinde bos jumys oryndarynyń jármeńkesi ótti. Jármeńkege 30-ǵa jýyq mekeme qatysyp, túıindemeler qabyldady.
Uıymdastyrýshylardyń aıtýynsha, atalǵan shara jastardyń, qala turǵyndarynyń jumyspen qamtylýyna yqpal etý, áleýmettik-ekonomıkalyq jaǵdaıynyń kóterilýine jaǵdaı jasaý, jumyssyzdyqtyń statıstıkalyq kórsetkishterin tómendetýge baǵyttalǵan.
- Bul joba óńirde jyl saıyn ótkiziledi.Jyl saıyn jumysqa turýshy jastar sany ósýde. Búgingi jármeńkege 2500-den asa adam qatysty, olardyń barlyǵy ótinish berip, jumysqa turý úshin túıindemelerin qaldyrdy,-deıdi Jastar resýrstyq ortalyǵynyń basshysy Serik Qadyrov.
Aıta keteıik, ótken jylǵy jármeńkege 20-dan astam mekeme qatysyp, 1200-den asa adam jańa jumys oryndaryna túıindeme tapsyrǵan bolatyn. Nátıjesinde 250-ge jýyq adam jumysqa ornalasty.