Ánshiniń týǵan qalasy Qyzylordada saltanatty túrde eskertkishtiń ashylý rásimi ótti. Is-sharaǵa Batyrhan Shúkenovtiń týǵan-týysy, dostary men jerlesteri qatysty. Sondaı-aq, sharaǵa qurmetti qonaq retinde ánshiniń jaqyn dosy Baıǵalı Serkebaev arnaıy keldi.
Músinniń kelbeti úshin Batyrhan Shúkenovtiń «Otan-Ana» klıpindegi qolynda saksofon ustap turǵan beınesi alynǵan. Eskertkishtiń jalpy bıiktigi 3,6 metr, músinniń bıiktigi – 2,2 metr, materıaly – qola; tuǵyrdyń bıiktigi 1,6 metr.
Ánshiniń anasy Dılıara Shúkenova oblys basshylyǵy men is-sharany uıymdastyrýshylarǵa óz rızashylyǵyn bildirdi.
«Baıqaýdy uıymdastyryp, eskertkishti ornatýǵa atsalysqan barlyq azamattarǵa úlken rahmet. Ulyma eskertkish qoıyp, onyń qurmetine saıabaqtyń atyn bergenderińizge óte qýanyshtymyn», - dedi Batyrhan Shúkenovtiń anasy Dılıara Shúkenova.
О́z kezeginde, Baıǵalı Serkebaev eskertkishti Batyrhannyń mýzyka ónerinde alǵash qadam basqan orny – Oqýshylar saraıynyń mańynda ornatylǵany kezdeısoq emes dep atap ótti.
«Búgin biz Batyrdyń týǵan qalasynda, Batyrdyń ózi árqashan saǵynyshpen eske alyp, balalyq shaǵyn eske alý úshin qaıtyp barýdy armandaıtyn súıikti qalasy Qyzylordada jınalǵanymyzǵa óte qýanyshtymyn», - dedi Serkebaev.
«Batyrhan Shúkenovtiń ár áni – naǵyz hıt. Bir ǵana «Otan-Anasyn» alaıyq. Alǵashqy notasy oınalǵan sátten-aq, Altaı men Atyraý arasyndaǵy ulan-ǵaıyr dalany eriksiz kóz aldyńa ákeletin ánniń áseri erekshe emes pe? Elbasynyń ózi bir kezdesýde ánshige «Otan-Ana» – elimizdiń ekinshi Ánurany» degen eken. Mine, osyndaı talantty perzentine Syr eli máńgilik eskertkish ornatyp, iltıpatyn bildirip jatyr. Bul eskertkish onyń týǵan qalasynyń tórinde jarqyrap, kórkine kórik qosary sózsiz. Onyń ústine osy saıabaq Batyrhannyń esimimen atalyp, keleshekte jastardyń, ánshini qurmetteıtin turǵyndardyń jaqsy bir demalys ornyna aınalar dep senemiz. Syr boıynyń talantty uly, óner tarlany Batyrhan Shúkenovtiń esimi qazaqstandyqtardyń júreginde máńgi saqtalady», - dedi oblys ákiminiń orynbasary Rýslan Rústemov.
Eskertkishtiń avtory – músinshi Murat Mansurov. Ol jasaǵan eskertkishtiń jobasy 2017 jyly baıqaýǵa qatysqan 8 jobanyń ishinde úzdik atandy. Eskertkish Qyzylorda oblysy ákimdiginiń tapsyrmasymen oryndaldy. Esterińizge sala keteıik, Murat Mansurov – «Qazaq eli», «Máńgilik el», «Kereı-Jánibek» monýmentteriniń avtory.
Aıta keteıik, Batyrhan Shúkenovtiń týǵan kúni qarsańynda oblys ákimdiginiń qoldaýymen Qyzylordada II «Otan Ana» respýblıkalyq ánshiler baıqaýy ótkizilip, as berildi. Sondaı-aq, keshke «Otan Ana» baıqaýynyń jeńimpazdary men qazaqstandyq estrada juldyzdary Dılnaz Ahmadıeva, Rınat Gaısın, Álı Oqapov pen Rústem Nurjigitterdiń qatysýymen gala-konsert uıymdastyrylady. Gala-konsert barysynda Batyrhan Shúkenovtiń repertýarynan tanymal ánder oryndalatyn bolady.