17 mamyrda Qazaqstannyń Irlandııadaǵy Elshisi qyzmetin qosa atqarýshy Erlan Ydyrysov Irlandııa Prezıdenti Maıkl Hıggınske senim gramotalaryn tapsyryp, Prezıdent Nursultan Nazarbaevtyń sálemin jetkizdi. Saltanatty rásimnen keıin bolǵan ekijaqty kezdesýde saýda-ekonomıkalyq jáne ınvestısııalyq yntymaqtastyq, IT-ındýstrııa, sandyq júıege kóshý, sondaı-aq bilim berý jáne ınnovasııalar salalaryndaǵy ózara is-qımyl máseleleri talqylandy.
Qazaqstandyq dıplomat M. Hıggınsti elimizde Qazaqstandy jańǵyrtý baǵdarlamalary aıasynda bolyp jatqan aýqymdy ekonomıkalyq jáne saıası reformalarmen jáne Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýynyń basty tezısterimen tanystyryp, «Astana» halyqaralyq qarjy ortalyǵy, sondaı-aq «EKSPO-2017» kórmesi negizinde qurylǵan «Jasyl» tehnologııalar ortalyǵy jáne halyqaralyq IT-startaptar parki týraly aıtyp berdi.
Irlandııa Prezıdenti M. Hıggıns Qazaqstannyń Memleket basshysynyń jetekshilik etýimen qarqyndy damyp kele jatqandyǵyn atap ótip, elimizdiń halyqaralyq beıbitshilik pen qaýipsizdikti nyǵaıtýdaǵy róline joǵary baǵa berdi.
E. Ydyrysov Irlandııaǵa sapary aıasynda, sondaı-aq Irlandııa Syrtqy ister mınıstrliginiń Bas hatshysy jáne saıası dırektory Nıal Berdjespen, mınıstrliktiń BUU Úılestirýshi dırektory F. Smıtpen jáne ırlandııalyq bıznes qaýymdastyq ókilderimen kezdesýler ótkizdi.
Kezdesýler barysynda Irlandııanyń resmı jáne isker toptary Qazaqstannyń Ortalyq Azııanyń ekonomıkalyq damý lokomotıvi, kóptegen halyqaralyq jobalardyń bastamashysy ekendigin, turaqtylyq pen ıntegrasııalyq prosester ortalyǵyna jáne jahandyq saıası jáne ekonomıkalyq is-sharalardy ótkizý ornyna aınalǵandyǵyn atap ótti.
О́z kezeginde, E. Ydyrysov Irlandııaǵa Qazaqstannyń BUU Qaýipsizdik Keńesine kandıdatýrasyn qoldaǵany úshin taǵy da alǵys bildirip, elimizdiń atalǵan uıymdaǵy qyzmetiniń tabysty qorytyndylary jóninde habardar etti. Sonymen birge, Irlandııanyń memlekettik deńgeıde ınnovasııalardy basqarýdyń biregeı qurylymyn damytýdaǵy edáýir tájirıbesin eskere otyryp, Elshi Qazaqstannyń bilim berý IT-baǵdarlamalary, startap ónerkásibi men ınovasııalardy damytý salalaryndaǵy ekijaqty yntymaqtastyqqa erekshe qyzyǵýshylyq tanytyp otyrǵandyǵyn atap ótip, ekijaqty sharttyq-quqyqtyq bazany odan ári keńeıtý qajettigine toqtaldy.