Astanada bokstan qyzdar arasyndaǵy Qazaqstan chempıonaty óz máresine jetti.
Elordada ótken el birinshiliginde buǵan deıin esimi elge belgisiz bolǵan eki burymdy qyz – Aqerke Baqytjan (69 kg) men Mılana Safronova (64 kg) jeńimpaz atanǵanymen este qaldy. Ulttyq qurama sapynda júrip halyqaralyq týrnırlerde júlde alyp júrgen qyzdar óz myqtylyqtaryn taǵy bir dáleldedi. Dodaǵa ár óńirden kelgen 76 boksshy qyz qatysty.
25 jastaǵy qyzylordalyq Aqerke Baqytjan 2014 jylǵy chempıonatta fınalǵa deıin jetip, ekinshi oryn alǵan bolatyn. Odan keıin Aqerke ulttyq qurama sapynda biraz kórinbeı ketken-di. Endi, mine araǵa tórt jyl salyp ulttyq quramanyń birinshi nómirli boksshysyna aınaldy. Endi onyń kelesi maqsaty – aldaǵy ýaqytta álem chempıonatyna qatysý. Qyzdar arasyndaǵy kelesi álem chempıonaty osy kúzde Úndistanda ótedi.
Sonymen qatar qaraǵandylyq Mılana Safronova da mansabynda tuńǵysh ret Qazaqstan chempıony atandy. Ol fınaldyq saıysta Azııa chempıony atanǵan óte tájirıbeli boksshy Madına Nurshaevamen kezdesti. Jekpe-jek aldynda bul kezdesý qıynǵa soǵatynyn Safronova sezgenimen, aıqas ýaqytynda Nurshaeva qaraǵandylyq boksshyǵa esh qarsylyq kórsete almady.
51 kılo salmaqtaǵy fınaldyq saıys ádettegideı eki dúrkin álem chempıony Nazym Qyzaıbaı men Jaına Shekerbekova arasynda ótti. Ádettegideı deýimizdiń sebebi, dál osy salmaqta Qazaqstan chempıonatynyń fınalyna únemi aty atalǵan eki boksshy shyǵady. Qyzaıbaı-Shekerbekova arasyndaǵy bıylǵy teketires Nazymnyń jeńisimen aıaqtaldy. Al 2016 jylǵy álem chempıony Dına Jolaman (54 kg) osymen jetinshi márte el chempıonatynda qarsylas shaq keltirgen joq. Rıo Olımpıadasynyń qola júldegeri Darıǵa Shákimova (75 kg) men álem chempıony Lázzat Kúngeıbaeva (+81 kg) bokstan Qazaqstan chempıony atandy. Sonymen qatar Áıgerim Qasenaeva (48 kg), Sánııa Sultanqyzy (57 kg), Rımma Volosenko (60 kg) jáne Farıza Sholtaı (81 kg) óz salmaqtarynda úzdik shyqty.
Qazaqstan birinshiliginiń qorytyndysy boıynsha 10 salmaq dárejesinde ótken jarysta jalpykomandalyq esepte Astana qalasynyń boksshy qyzdary kósh bastady. Olar úsh altyn, eki kúmis medal jeńip aldy. Almaty qalasynan kelgen boksshy qyzdar eki altyn, bir kúmis jáne tórt qola medalmen ekinshi orynnan kórindi. Úzdik úshtikti Aqmola oblysynyń boksshylary túıindedi. Olar eki altyn jáne úsh qola medal enshiledi.
Jarys qorytyndysy boıynsha aldaǵy Azııa oıyndary men álem chempıonatyna qatysatyn boksshy qyzdar irikteletin bolady.
Erkebulan JOMART,
«Egemen Qazaqstan»